يدش البيت لا هود ولا هدى معصب ويزاعج ..... ماااااااااااااااااااري يا ماااااااااااااري يعلش البط وينج
ترد عليه أمه من داخل المطخ : بلاك عافانا الله ماكل عمرك الخدامه هناك عند يدوتك بلاك داش البيت معصب .
يلوح بأيده ويقول : بس انزين بس بييج بييج .
يدش المطبخ ويروح سيده عند الجدور ويفتح أول جدر ويقول شو الغدا اليوم .
ترد أمه بدون أن تطالعه : مرق سمج وشي جشيد اذا تبا .
يطالع امه بعد ما سكر الجدر ( اونه معصب ) هو هو كل يوم هذا الغدا عن ابوه ملينا
ترد أمه اللي أصلا ما معبرتنه : برايك تبا هذا الغدا ما تبا عندك خمسين طوفه اتنقى منها اللي تباه .
يطلع رشود من المطبخ حتى باب المطبخ خلاه مشرع ( اللي ما يستحي ) يدش الصاله ويشوف لك الا يدوته مريحه والخدامه قاعده تهمزها ( مكر العيايز ) ويطوف جدى يدوته ( أونه ما معبرنها معصب الحبيب )
تقوله يدوته : إيه حووووه بلاك انته يلي ما تستحي سود الله ويهك من صبي لا سلام ولا كلام عيال آخر زمن
يرد رشود بعد ما وقف : سلام .... ها شو عندج
ترد اليده : ما عندي شي غير اني اشوف ويهك النحس طف عن ويهي
يثور رشود بس ما قادر يرد على يدته بس قدر على الخدامه : ماري مالت عليج يالس ازقرج من الصبح جيه ما تردين علي .
ترد الخدامه وهي قاعده تهمز العيوز : رشود انته كله قرقر بس انا مني مع ماما كبير انته ما يشوف .
يدش رشود غرفته خمس دقايق ويظهر من الغرفه ويتصل بالكافتريا : ألو أقولك سويلي واحد همبرجر دياي دبل جبن وسندويشة فلافل وحده وعصير كوكتيل وجيبه بيت بو علي خله حساب بابا اوكيه
ترد اليده : انت اللحين تاكل من المطاعم همبجبج وما ادري شو وتدور غدا البيت وتخسر ابوك الفقير صدج ما عندك سالفه .
وادش أم علي وتسمع رمسة اليده وتقول : يا اميه شو تبينه خليه برايه ياكل له اكل المطاعم بس أنا بعلم أبوه عسب ما يعطي المطعم بيزاته .
شوي ويأذن الظهر وتنش اليده ويالله يالله توقف (يحليله عندها عصا جديمه من حطب المزي) وتقول : يالله روح المسيد صلي ولا والله لا تشوف العصا بظهرك اللحين يالله فارج .
يطلع رشود من البيت ( أونه معصب ) ويقول بخاطره : متى بشتغل وبفتك ويدش المسيد تيدد ودش أول واحد يجابله داخل المسيد أبوه صلى رشود ركعتين وبعد ما خلص عطاه ابوه رمسه من عيونه , فهم رشود نش من مكانه ويروح وياخذ له مصحف ويتم يقرئ لين ما قاموا الصلاة صلى وتوه بنش ويزعج ابوه عليه رشود تسنن , يوقف رشود ويتسنن ويظهر من المسيد يبا البيت .
عند باب البيت الهندي راعي الكفتريا ويا سيكله البيدر قاله رشود: ها كيف حالك عطني السندويش خلي حساب بابا ويرد الهندي: ما فيه مشكله بابا .
ياخذ رشود السندويش ويدش البيت.
وما يعبر حد ويروح سيده غرفته .. ( طبعا مش بروحه وياه حمود أخوه الأصغر ) اللي دش عقبه وقال له : رشود ما تبى غدا البارحه يايبن سمج على هواك شعري وجداد وبياح وبصراحه اخير عن صالونة اميه ما بتحصل .
يطالعه رشود بنظره جانبيه : يا عمي روووح انت وغدا البيت الممل انا طلبت سندويش من الكفتريا لا تتم تأذيني .
يرد حمود : برايك محد ضربك بأيدك .
طلع حمود من الغرفه وشاف العايله الكريمه متيمعه عند السفره سلم وقعد .
بو علي : حمود وينه اخوك العود رشود . يرد حمود : بالغرفه قاعد ياكل سنوديش .
يلف الأبو راسه صوب حرمته ويقول : شفتي شو يسوي ولدج اللي ما يستحي يودر غدا البيت وياكل من مطاعم وآخرها قم يا بو علي وادفع .. ويرد ويزاعج رشوووووووووود رشوووووووود ويهد .
يرد رشود ها ابويه ياي ياي .
ويطلع من الغرفه ويوقف عند السفره وبأيده السندويشه بعده ما كل منها شي .
قاله ابوه : يعني يلي ما تستحي ولا تخيل على ويهك متى بتتعلم انته لا نافع بدراسه ولا حتى بالبيت
يرد رشود وهو منزل راسه : ما سويت شي .
يرد أبوه : شقايل ما مسوي شي يلي ما تستحي .. والله إذا سويتها مرة ثانية لأطيح بك بالعصا يله طف عن ويهي .
ما يصدق رشود ويدش غرفته وهو يقول : وابوكم كل يوم مزاعج أف الحمد لله خلني آكل وأرقد شوي .
ويفتح بو سنيده ( يحليله ) السندويشه وياكل وبعد ما كل وشرب العصير سمته برقده .. شوي حس بويع ببطنه .. زاااد الويع ... نش من الرقاد وميود بطنه ... وهو يقول ويتويع : أأأأأي حموووود حموووووود الحقني ينش حمود زايغ ويقول : بلاك بسم الله عليك شو فيك ... رشود : مااااااااا أدري بطنيييييييييييييييه أأأأأأأأأأأأأأأي .
ينش حمود بسرعه ويركض صوب غرفة ابوه ويدق الغرفه : أبويه أبويه .. يرد الأبو : بلاااااااك شو عندك .. حمود : رشود يعوره بطنه ما أدري بلاه . شوي وينفتح الباب ويربع الأبو صوب ولده رشود ويقوله : بلاك أبويه بلاك.. يرد رشود : بطني بطني ما أدري شو ياني ...... بو علي : قم بوديك الدختر لا حول ولا قوة الا بالله قم قم .
ويتساند رشود بأخوه حمود وأبوه لين السياره ( كروزر موديل 87 ) ويوصل المستشفى بالطواري بعد ساعه أيي الدكتور عند بو علي : انت ابو المريض .. يرد بوعلي : هي يا دختور انا ابوه بلاه الولد .. يرد الدكتور : حالة تسمم بس الحمد لله طافت على خير ... شو ماكل قبل أن يجي . يطالع بو علي محمد ولده ويتهكم ويقول : ماكل سندويش من المطعم يا دختور .
يهز الدكتور راسه ايجابا ويقول : عموما بعد ساعه خله يروح لأنه حالته مستقره اللحين .
يروح الدكتور جنه يعاين حاله ثانيه والأبو يطالع ولده حمود ويقوله : هاي آخرتها الولد يتسمم وزين ما راح علي .. وأمك بالبيت تشقق ثيابها على ولدها وهاك أخوك مرقد وكله بسبة ها المطاعم .
دش بو علي عند ولده اللي مرقد ( يحليلك يا بو سنيده ) قاله : الحمد لله على السلامة يا بوك .. رد رشود بصوت خافت : الله يسلمك يا بوي .
قاله : ما قلت لك يا بوي خلك من أكل المطاعم ما تسمع الكلااااام .. رد رشود وهو يطالع تحت : اي والله يا بوي صدقت وهذا درس تعلمت منه .
باليوم الثاني دش رشود البيت عاد هب شرات أمس دش المطبخ سلم على أمه ها اميه شو الغدا .. ردت الأم : غدانا مودم دياي تبا والا برايك .. قال : أبا أبا أفااااااا يالوالده تعلمنا خلاص .
دش الصاله شاف يدوته عاد هاي المره واقفه : السلام عليج يدوه .. ردت اليده : وعليكم السلام : هاااا مأدب اليوم اشوفك .. يرد رشود : افا يا يدوه أنا دومي مأدب ..
ترد اليده وتقول : والله محد أدبك إلا بطنك .... ينزل رشود راسه ويرد بصوت خافت : والله صدقتي يا يدوه .
رد مع اقتباس
قصة رشود (حلوة الصراحة)
ضوابط المشاركة
