تخلوا عني!!!!

[ام محمد من راك]

وانا فالبداية حسبالي موضوع احمد!!!

عالعموم بخصوص موضوعك ياااااكثر ما سمعت وشفت

خلك من الاصدقاء والخلان وتعال عالاهل نفسهم

من فترة قول قرابة السنتين مر علي موقف مستحييييل انساااه بحياتي وكان بمستشفى عبيد الله

كانت اختي امرقده وكانت هاذي هي المرة الاولى الي ادخل فيها هالمستشفى

كنت بايته وياها ليله والوالدة كانت ويانا ,,بحيث اذا نشت اختي واحتايت شي انا اكون موجودة

المهم انا هاييج الليلة مانمت ..

وكنت احاوط فالقسم الي نحن فيه,,ابا اشوف الغرف والسسترات (من الملل)

استوقفتني بنت عمرها بين11او12 سنة وشكلها هالبنت امعسكرة بالمستشفى لأن الكل يعرفها من دكاترة وسسترات وكانت اتوايج علي من دخلت القسم عالعصر ليين صكرنا باب الحجرة ويوم طلعت يت صوبي وتميت اسولف وياها وعرفت منها انها اتزور يدتها ام ابوها ومن الملل الي فيها كانت اتوايج عالرايح والراد ويوم شافتني اتوقعت من شكلي اني وحدة امسولفجية وتبا اتهذرب وياي (ما شاء الله عليج فنانة انتي بالحكم على الناس),,المهم خذتنا السوالف والسوالف وبدت اتعرفني على اقسام المستشفى,,قالت هاي حجرة كذا وهاي حجرة كذا و(هاي حجرة الي مب امطولين واايد وبيموتون)!!!!!!
فاجأتني نبرتها العادية جداً وكأن الامور طيبة عندها,,شافتني امبحلقه فيها جان تظحك قالت:عادي انا واااايد شفت حريم ماتوا اهنا ليش مستغربة؟؟وانا تمت ايدي تتراجل صوب الحجرة قتلها:اخبرج قومي سرينا عند يدتج بشوفها وبسلم عليها,,رحت عند يدتها وحليلها كانت اتعاني من ظهرها وايدها وطوووول الليل اتون,,دخلت وسلمت وماااااقصرت بالسوالف ,,عقب قتلها :خالوه بخليج اتريحين احينه وبنطلع عنج..كملنا طريجنا عالساعه3وثلث الفجر,,اشوي وجان نسمع اصوات الاجهزة من حجرة الحالات الحرجة مثل ما يقولون,,دخلت الحجرة ولأول مرة وكانت معاي البنت,,شفت منظر نزل ادمووعي لا ارادي ,,قلت فنفسي لا حول ولا قوة الا بالله ام برووحها عمرها فوق السبعين او الثمانين يتراوالي وبروحها !!!!حتى بشكارة ما عندها..ودخلت كمن سستر على اعيلة يحطوون لها جهاز انعاش القلب

انا ما استحملت الموقف وطلعت ,,اشوي وحدة من السسترات اشوفها ادق على رقم (فهمت من المكالمة انه ولدها) ويا عقب ساعة ويمكن اكثر ,,شاب يمكن عمره فوق الثلاثين ومن شفته قلت اعووذ بالله فخاطري ,,السواد يملى وييه والجقارة اتفوح منه,,كرهت من شفته ويهه وحسيت بغصة فصدري وقلت مب من شي وحليلها تامة بليا ونيس ,,تجرأت من كل معاني الحياء وسرت عند امه وشليت ايدها وقربتها من ويهي وبستها وحطيت ايدها عصدري وانا اصيح ,,صرخت فويهه قلت هاي امك الي ياي احينه بتشوفها عقب ما قالولك احينه بتودع؟؟؟هاي امك الي ما سألت عنها لا انت ولا حد من اخوانك ولا حتى خليتوا وياها عالاقل بشكارة عندها ترعاها؟؟!!! احينه ياي اتشوفها شو شاغلنك؟؟هاي لو امي احطها عراسي مب اخليها معقوقة بالمستشفى جنه ماوراها حد واخلي الاطبا يلعبون فيها لعبة بين ابر المغذي والكليسترول وغيره؟؟!!!!هانت عليكم امكم اتخلونها جذا؟؟ولا حتى بناتها سؤلوا فيها؟؟!!!

رد علي بكل وقاحة:ما وراها فايدة اختي حتى لو تامين وياها هي اساساً ميته شو تبينا انجابل فيها ..ما اتحس بلي حواليها بس قلبها الي يدق؟؟
ردت البنت :انته اصلاً روحك ما تبا اتجابلها لا تتعلث اونها ميتة بس قلبها الي يدق
رديت عليه:والله حرام ..هاي البركة لو خليتوها فالبيت تدري ولا لأ؟؟ربكم بيبارك فرزقكم وعيشتكم دامها عايشة وسط اعيالها حتى لو كانت ما اتحس بلي حواليها,,يكفي رعايتكم لها ,ربي بيجازيكم خير

بعدها دخلوا السسترات وقالوا مانبا حد فالحجرة
طلعت انا والبنت وكلنا حزن على الي صار ,,انا الي فحياتي ما دخلت دار العجزة ولا شفت معاناتهم ,,ربي راواني اياها اليوم وراواني بني آدم مسؤول عن وحده يسميها امه!!!!
يالله على هالزمن ,,,,والله الواحد يخاف من المستقبل
هاييلا عيالي الي انا ربيتهم ؟؟!!!!شو سووبي؟؟عقوني ولا سؤلوا فيني؟؟!!!!والله الكلام يعور القلب
لكن منوا الي بيحس

وصارلي كذا موقف هالسنة بس ماحبيت اذكرهم عسب ماطول اكثر فالرد واترك المجال لغيري

ولربما افتح موضوع يديد عن الي صار واشوف راي الاعضاء ووجهة نظرهم

شاكرة لك اخوي على هالطرح الطيب

والسموحه