انا بخبركم تجربتيه ، فلان جمعني فيه البزنس و الفكره فكرتي ودخلنا مشروع ، المهم في نص الطريق طمع

خذ كل المجهود لصالحه فوق هذا حاول يقنعني انه هوه خسران وانا السبب فالخساره وانا اعرف انه لا خسران

ولاشي وو يوم جفته قام يتهرب واجهته ف قالي يا منصور مالك حق عندي قتله كلمتين ورد غطاهن فلان بيني

وبينك المحاكم سرت خذت كل ماعندي من اوراق وادله واثباتات انه انا طرف فالمشروع هذا وتناقشت مع

المحامي وافقني الراي ورفعت دعوى عن طريق المحامي مالي وخلال سنه انحكم في صالحي ضده

الزمته المحكمه يرد لي بيزاتي ودفع لي مبلغ تعويض وب جذه رد لي حقي وزياده سبحان الله ماضاع حق من وراه

مطالب ..هو ماطاع ايرد حقي بالطيب والطيب ما يابه ف استخدمت القوه وخذت حقي بالقوه

بعد ماخلصنا الجلسات قلت في خاطريه اللهم اني قد سامحت فلان لا دعيت عليه ولا شي

المهم مرت السنين وف يوم التقيت ويا واحد من اهل فلان سلمت عليه وتمينا نرمس ف يوم يا طاري

فلان اللي ارمسكم عنه قال فلان الله يرحمه

قتله ليش ؟ فلان اتوفى ؟

قالي هيه سوى حادث واتوفى ع طريق دبي وصار له 6 شهور

انصدمت ما صحت بس دمعت وتميت يومين مضايج بس دعيت له بالرحمه وحمدت ربي انه عطاني حقي فالدنيا

وانه مافيه شي في ذمته لي عن نفسي ماباه يتحاسب عن سالفتي وياه مهما كان الدنيا ماتسوى

صح هو جرحني وظلمني في يوم م الايام بس الله يرحمه ويغفر له واللهم اني قد سامحته