أشياء من الماضي


يا مرْكَبٍ طَبْعَانِيْ

وِيْتوح مِنْ يَزْوَاهْ

اْلاوَّل فِيْه وْرمَاني

وِيْتوح مِنْ يَزْوَاهْ



********************************************





أنا الذي مشتاق لك في غيابك

والاَّ أنت ما يطري على بالك الشوق!

لو بك مثل ما بي ترى الحب جابك

لحظة لقا ما بين عاشِقْ وْمَعْشوق

يا لَيْه لَيْه وْلَيْه تجفي أحبابك

شِفْني أَرَدِّدْهَا مِنْ الوَجْد مَحْروق

تِسْقى ليالي عِشْتَهَا مَعْ جنابك

يوم المحبّه بيننا شَرْع وِحْقوق

ما ادري غَلا والاَّ جفا اليوم صابك

مِتْجَرِّعٍ كاس الوَلَهْ تخفي العوق

درب المحبّه إكْسِبِهْ في شبابك

والاَّ الجفا خَلِّهْ مَعْ الوقت مَلْحوق

إن جيتني يا مَرْحَبَا ويا هَلا بِكْ

وان رِحْت عَنِّيْ خافقي مِنْك مَسْروق

كل العمر يمضي في نِيَّةْ حِسَابِكْ

أشريك يا حبّي ويا سارق الموق

حِس الغَلا لا نام جِفْني سرى بك

في بيت حِلْمٍ عن هَل الواش مَغْلوق

تدري وِشْ اللى جابني في غيابك؟

إنِّك تزيد الشوق شوقٍ على شوق



شعر: توجَّاد ـ الهِيَرْ