مساعدة الناس

[بوحارب الفلاسي]

والله برمس بصراحه ولاتفهموني غلط شي مثل ايقول (سو خير وفرّه بحر)

يااماا سااعدنا ويااما سوينا ووقفنا وقفة ارياييل مابغينا شي الواحد يطلب الاجر من الله حتى ما اتريينا كلمة شكرا من حد بغينا ويه الله بس مع احترامي فالحياه هاي شي نااس يستاهلون وفالمقابل شي نااس والله مايستاهلون انك تتعنى عسبهم لاتفهمونيه غلط بس تبت اسااعد حد .. والله شبعت م الحركات اللي تستوي

وخلنا واقعيين احس انه الطيبه في زمننا الناس تفهمها انها هباله يعني يوم تكون طيب غيرك بيتحسب انك (اهبل) خصوصا اهل المقاصد(اهل المصالح) للي ماايعرف
وانا ريال صراحه شبعت من الاستغفال .. والمواقف لاتعد ولاتحصى و على كل موقف ما اعرف اضحك ولا اصيح صراحه والله العظيم جد
اخر موقف تعرضت له ريال انا ادري انه محتاي ، كان مطرود م الخدمه العسكريه ومافيه مجال يرد لانه غياب وفرار م الخدمه و حس بغلطته قال برد الخدمه وكان محصل صعوبه فالاجراءات مال اعادة الخدمه اتصل فيه وطلب منيه انيه افزع له ، ومع انه مب من ربعي المقربين لكن فزعت له مهما كان اعتبرته اخو وربيع وانا صراحه ربعي لو يبون عيوني المركبه تفداهم قلبيه رهيف حليلي حنون ماشالله المهم سعيت في الموضوع كأن الموضوع موضوعيه هب موضووع الريال صراحه .. وماكان يتصل بي وايد واستوى يتصل فيه بشكل يومي يوم قتله موضوعك اعتبره خالص يافلان و مرن الشهور وخلصت اموره من الالف للياء خلصت اموره طولت عماركم واتصلت به يافلان اتراه موضوعك خالص سر المكان الفلاني واستلم اوراقك وبطاقتك والخ ماقال مشكور شوه قال : اوكي وسكر
قلنا ماعليه يالله يمكن الريال من فرحته نسى ولا شي جد لاخيك المسلم سبعين عذرا
المهم سار خلص اموره واوضاعه و قطع لي تعرفون شوه يعني قطع لي حتى اتصال مايتصل ولا يعترف انه بوفلان سااعدني وانا ماكنت اباه يعترف جدام الناس ع الاقل بينه وبين نفسه .. ومازعلت اعرف ان الاجر باقي لين يوم الدين وانقطعت اخبار الريال لانه المصلحه انتهت مع احترامي

بعد فتره مدري شوه سوى و انطرد للمره الثالثه ياني علم عنه انه مطرود ومحصل صعوبه انه يرد لانه ماعنده مؤهل والقانون اليديد في كل مكان يبون الثانويه العامه المهم من وصلني علم عنه اتوقعت اتصاله واتنبأت فيه المهم اتصلبي يسولف ويضحك وانا عارف شوه يبى بس اترياه يرمس اخر شي رمس واكتشفت انه يباني اسااعده يرد الخدمه يوم قلت له اسمحليه يافلان انا ماروم اسويلك شي ها المره ماشفت رقمه ع تلفوني ..

ولو اكتب عن المواقف ماتكفيني صفحه ولا صفحتين يبالي ديوان هيه نعم ديوان

ماقولكم لاتساعدون سااعدوا و لكن لاياخذكم الحماس وايد واحذروا من لاستغفال لاتبالغون فالطيبه
ترى (كثر الدق يفج اللحام) ..

عن نفسي شبعان قد شعر راسي وتأدبت ، الدنيا اتادب تراها والله العظيم
توبه والله توبه