يزاج الله خير.. وانا اضم صوتي لصوتج من هذا المنبر..
انا بعد معلمة.. او بالاحرى كنت معلمة السنه الماضية.. كان نصابي 24 وماعندي اي مساعدة تعاوني في الشغل.. والله كنت اتعب تعب.. لكن كنت اقول ماعليه عشان يطلع من عندي جيل تفتخر به البلاد.. وكنت اعتبر الطالبات بناتي..
طبعا المدرسة ماتمولني لما احتاج.. فصبغت الصف ع حسابي الخاص.. وكنت اشتري الهدايا من حسابي الخاص.. وكنت اضبط اي شي في الصف ع حسابي الخاص.. وقلت ماعليه.. ماريد اقصر في حق طالباتي..
وسبحان الله.. في بداية هالسنة ياني اتصال من الجامعه انهم قبلوني اكمل دراستي (كنت مقدمة من قبل).. طبعا فرصة ماتتعوض.. ع طول قدمت ع اجازة دراسية.. محتاجة تفريغ دراسي سنه وحده بس.. اتفاجأت انها انرفضت.. اضطريت انقطع عن العمل لين اخلص اجراءات الاجازة ولأن الدراسه في الكلية بدت من شهر وانا توهم مكلميني.. فما اريد يطوفني اكثر من جي..
تميت اراكض ورا المنطقة التعليمية ومجلس بوظبي للتعليم.. قالولي اصبري.. المديرة كانت متوترة.. تبغي ترفع الانقطاع ومترددة.. هم يقولون لي اصبري وانا اقول للمديرة اصبري لأني ماكنت اداوم المدرسة..
المهم عقب قالوا لي طلبج مرفوض لأنج ماعندج خبرة عمل سنتين.. وباقي الشروط في القائمة كلها متوفرة عندي.. وسبحان الله على هالنقطة بس ماقدروا يعفوني ويعطوني اجازة..
كنت امووووت وانا اشرح واتعب وشغلي اخذه للبيت من تصحيح ورصد درجات لكن مالقيت تقدير على هالشي.. راتبي كان 19.000 .. زميلتي في الكلية زمان.. اتخرجنا مع بعض.. سبحان الله لقت وظيفة في وحده من الوزارات.. راتبها 38 ألف وهي توها متعينه.. وشغلها شغل مكتبي بسيط.. الله يبارك لها ان شا الله..
الخلاصة.. المديرة رفعت فيني الانقطاع.. وتم فصلي من وزارة التربية والتعليم.. (للأبد).. كلموني المنطقة وقالولي خلاص ماترومين تقدمين كمعلمة مرة ثانية.. وبصراحه.. عن نفسي.. لو ياتني الفرصة مرة ثانية ماراح اختارها اصلا.. لأنها متعبة.. مجهدة جدا.. مافي تقدير.. وفي معلمات كثير (مضطرين) يقبلون بالوظيفة بسبب اهلهم وازواجهم.. لأن فعلا لما انت تتعب وتهلك وماتلاقي تقدير لازم بتنحبط!!