سلام الله عليكم ورحمته وبركاته
شحالكم عرب راس الخيمه؟
عساكم بخير وسهاله؟
طال عمركم الله سبحانه وتعالى من علينا بطلعه فنانه لبحر الرمس لي مالي غنى عنه بالمره ولو أني هب من أهل الرمس ^^ ولكن سبحانه عز وجل أمحبب هالبحر بالذات لنفسي ومطمئن لروحي
وللأسف ما صورت ذيج الصور الغاويه ولكن الحمدلله على كل حال
بس صورتلكم شي فنان وايد كلنا تعاونا عليه من كبيرنا لصغيرنا ^^ وفعلا الكل استانس وارتاح ذاك اليوم ولنا نيه انرد قريب وهاي بعض الصور والسموحه ^^
هني الله ايسلمكم ع طول ماصدقوا وصلنا بعده الوالد طول الله بعمره مابند الموتر الا كلهم تعافدوا ع بعض فـ الموتر واحدروا يترابعون للبحر ^^
وهذي صوره ثانيه والسموحه ع التصوير لأنه من فونيـ ^^ وع السريع
تموا لين المغرب فالبحر يسبحون ويلعبون ومايظهرون الا لي بغوا ماي أو عصاير وما أيوزلهم شرب الماي أو العصير الا فالبحر ^^ ههههههه
(وبصراحه في شغله وايد عيبتني فالصغاريه لي خلصوا من الماي ولا العصير شلوا الغرش الفاضيه وفروهن فالسله لي كنت يايبتنها ويايه صدق استانست منهم لأنهم حافظوا
على نظافة المكان وان حد منهم فر وصخ انفتوا عليه عسب ايشله ^^ فديتهم)
هني طال عمركم أذن المغرب تيمعوا الكبار وصلوا بس ولد اختيه أتأخر شويه عنهم وصلى بروحه ^^ فديته الله يهديه ويصلح باله وايثبت قلبه على الدين والطاعه والعباده
وبعد ماخلص صلاه ربع صوبي وقال لي يلا الحين صوريني ويـــــاااا ^^
عرفتوا شو هو صح ^^ ؟؟؟
الحمدلله سبحانه الله أكرمنا وحصلنا كميه كبيره من ((الدوج)) عيال نواخذه فـ هالشي كان اختصاصنا ونسابق لي ايحصل اكبر كميه ^^ واختيه اتحدد عدد معين ولي ايحصل هالعدد له جايزه بمبلغ مالي بسيط ^^ واستانسوا اليهال وكل واحد ايسابق الثاني عسب ايحصل قبله
وهاي صوره ثانيه ^^
وهني الوالده الله يعطيها الصحه والعافيه وايحفظها لي وايحفظلكم امهاتكم وايطول بعمارهم (قولوا آمين)
ماقصرت نظفت الدوج وودنته فالماي وخلته لليوم الثاني عسب الغدا وللأسف ماصورت سار عن بالي عسب الكل تيمع فبيتنا خواني وخواتي كلهم عسب الدوج وكانت أحلى عزيمه والوالد ذبح من المزرعه ماقصر
هني بعد مانظفوه ^^
والسموحه منكم ان طولت عليكم ^^
والله يجعل أيامنا وأيامكم كلها سعاده وهنا وراحه بذكره وطاعته
اللهم آمين
رد مع اقتباس