تسجيل دخول

عام الاستعداد للخمسـين

  #1  
قديم 29 - 5 - 2009, 03:06 PM
الصورة الرمزية الوطن موال اخضر
الوطن موال اخضر الوطن موال اخضر غير متواجد حالياً
عضو برونزى
 
تاريخ التسجيل: 21 - 11 - 2008
الدولة: بوظبي
المشاركات: 1,011
معدل تقييم المستوى: 48
الوطن موال اخضر is just really nice الوطن موال اخضر is just really nice الوطن موال اخضر is just really nice الوطن موال اخضر is just really nice
ديــــوان فزاع الاول












من هو فزّاع ؟؟


أنا عنواني اشعاري واسمـي فـي معانيهـا
وأوّل بيت أنا قلتـه غـدا تاريـخ ميـلادي


إذا تنشِدْ عن أخبـاري مـن اوّلْهـا لتاليهـا
أنا اشعاري هي اخباري على ما اْريد تنقادي


وانا أمّي إماراتي ولِدْت وعشـت أنـا فيهـا
وابوي أمجاد عرباني وطاري ماضي اجدادي


واخواني أنا المليار مسلـم فـي أراضيهـا
وانا القـرآن والسِنّـه غَـدَوا زادي وزوّادي


أعيش هْمومي وفَرْحي ولا لي نيّـه أخفيهـا
وأكبر همّي المقدس وطفـلٍ جنبـه يْنـادي


يهزّ بْصَرْخته أرضٍ نوى الصهيون يمحيهـا
من التاريخ، والعالم وقَفْ مكتـوف الايـادي


وانا ايّامي هـي اسْتـاذي تعلّمنـي لياليهـا
فلا خيـرٍ بإنسـانٍ يِفـادْ ولا بَعَـدْ فـادي


و(زايد) قِدْوِتي (زايد) و(زايد) من يزهّيهـا
بلاده شانها عالـي باسمـهْ دايـمْ تْشـادي


وروحي (محمّد المغوار) ابن راشد يغذّيهـا
من أشعاره من أفكاره، بنيت بْمجدهْ امجادي


مرَبِنّي على الجودْ وعلى المعروف واحميهـا
بلادي حبّي الأول ولا لـي غيرهـا بـلادي




خلاص يعني

خلاص يعني كل شَيّ انتهى وراح
خلاص يعني مـا بقينـا حبايـب


يعني وعودك كلها كانـت مْـزاح
والاّ انت ما لك في المحبّه رغايب


وين العهود ووين لحظات الافراح
يعني تلاشت مع هبـوب الهبايـب


القلب بعدك من له اليـوم يرتـاح
من بعد ما هو في محبّتْـك ذايـب


ياما على شانك تحمّلت الاجـراح
وياما جروحي من صدودك عطايب


سرقتني عن جملة الناس يا صـاح
والفكـر عنـدك ماخذنّـه نهايـب


خِلّك يحبّك يا بَعَـدْ سِيْـد المْـلاح
إن رحت عنّه راودنّـه مصايـب


خَلّك معه دام الهوى حيل نضّـاح
والواش رِدّه يا هوى البال خايـب




مـمـنـوع أخـــذ الـثــار

مهداه إلى اللواء ضاحي خلفان تميم

شكواي (بو فارس) على اللي سرَقْني
دامك خبيـرٍ فـي أمـور الجريمـه


شَخْصٍ أخَذْ قلبي وْصَـدّ وْهجَرْنـي
من بعـد مـا كِنّـا نديـم ونديمـه


زَور ملفّـات الغـرام وخدَعْـنـي
بعد الأمـور الواضحـات السليمـه


وافي أنـا بْحبّـه ولكـن صدمنـي
والله يا (ضاحي) صَدْمتي به أليمـه


ياما جَـرَحْ نـاسٍ ويامـا طعنّـي
وياما نَهَبْ نـاسٍ وْكـلٍ خصيمـه


لا تقول منّي، لا حَشَا هـوب منّـي
ممنوع أخْـذ الثـار ثـاري لزيمـه


بْكَشْف الجريمه أمنكـم مـا لَحَقْنـي
مجرم ما بين الناس هـذي عظيمـه


باعطيك من وصفـه ودوّر وعنّـي
واعمل تحرّي فْ.. كل بيتٍ وخيمه


كانـك لقيتـه لـى شبيـه الدمنّـي
أبـو العيـون الناعسـات العديمـه


أهو الذي بْحِسْنه يا (ضاحي) غلبْني
ولا اظن ترضى لي أنـا بالهزيمـه




القضا بالقضا

لا تحاول تعيد بدمعتك ما مضـى
ما تداوي دموعك جرح طول البعاد


إنتهى الحب يا اللى بيننا وانقضـى
ولا بقى لك بقلبي غير ذكرى وداد


كنت أجيك بْخفوقٍ فيه حبّ ورضا
وكنت انته حبيبي غايتي والمـراد


وكنت أشوفك حياتي جوّها والفضا
وكنت يومٍ تغيب آموت هَمّ وْ نكـاد


بس خِذْها بْصَراحه القضا بالقضـا
ذوق كاسٍ شربته منْك اسمه عنـاد


يرفض القلب مثلك به ودادٍ حظـى
دامه انسان مثلك قطعةٍ من جمـاد


ما تعيش المشاعر في خفوقٍ فضى
كيف تبني ودادٍ له عنـادك عمـاد


يا فقير المشاعر، يا شتات الشظـا
المحبّه بوادي، وانـت والله بـواد





(أمّي)

وش خانة (دبـي) وْبَحَرْهَـا
مادام شمس (دبي) مـا حَـدّ


تبكـي فيافيهـا وشجَـرْهَـا
والطيـر عيّـا مـا يـغـرّد


و(زعبيل) لى مظلم قصرْهَـا
ما به سوى صوت الصدى يْرِدّ


وِنْجوم تسـأل عـن بدرهـا
لى ينير داجي الليـل الاسـود


يـا شمعـة الـدار وسفرْهَـا
يا امّي مـن الشـوق آتوقـد


إن كان شِعْري مـا حصرْهَـا
الاشواق تظهـر فـي التنهـد


تجيب لـي النسمـه عطرهـا
لى يْغَار منّـه فايـح الـورد


القلـب ينبـض بـه ذكرهـا
وِطْيوفها فـي العيـن ترقـد


الله يطـولْ فــي عمـرْهَـا
وتبقـى لنـا وبعمرهـا يمِـدّ


وعساه مـا يطـولْ سفرْهَـا
وِلْنـا بخيـر انشـا الله تْـرِد




أنا في الشعر

أنا في الشعر ابن هذاك إذا إنته تعَـرْف الشعـر
أهيجْ في البحور أمواج، أمشّيهـا علـى كيفـي


واقول لك لا تجاريني ترى أمشي بدربٍ وعـر
واذا تبغي تجاريني تـرى لـك صامـدٍ سيفـي


ولا تضمن تحوز النصر وانا بحرٍ وانتـه نهـر
واذا عارضت تيّاري تبـرّى موجـي وْسِيْفـي


وكم من واحدٍ غيرك تعرّض لي وجـاه الكسـر
ودارت به هبوب رْيَاح فـي أقـوى عواصيفـي


تهاجم سايل الأقلام وسطـرٍ مـا يهـزّه سطـر
وإنته وينهـا افكـارك عـن بْيوتـي وْتهديفـي


تبا روس العلا وانته تحوّل في طريقـك حـدر
تحاول بس ما تِقْـدَرْ بـأن توصـل مشاريفـي


نجوم الليـل ماتنـوِرْ إذا بيّـن شعـاع البـدر
وش اللي يجمع الوسمي على سحب ورْعد صيفي


تشوف الجاذبيّه لي فـي هالدنيـا تجـرّك جـر
أنا عكسه أفرّك ويـن مـا أبغـي علـى كيفـي





أبونا وشيخنا

( الى مقام صاحب السمو الشيخ زايد بن سلطان ال نهيان ( يرحمه الله ) في عيد الجلوس السادس والثلاثين )


تشوفون الشِتا والصيف تشوفون السحب وأمطار
تشوفون الشَجَرْ والطير وأمن وخيرنـا سايـد


تشوفون الفَـرَح يالّلـي يداعـب وَرْدة النـوّار
وفجرٍ يا حلا صبحـه نسيمـه عِطْـر مِتْزايـد


تشوفون البَحَر والبَرّ، جبِـال وتحتهـا أنهـار
تشوفون الأراضي كلّها تِزْهِـر لاجِـل واحِـد


لاجِل مَن وَحّد الدّولـه زعيـم وقايـدٍ مغـوار
أبونا وشيخنا (زايـد) ومَـن مِثْلِـه لنـا قايـد


بَنى مَجْد وبنى عِزّ وبَنى صَرْح الوطن باصرار
بَنى شَعْبٍ تحَت ظِلّه فِدى لْهذا الوطـن صامِـد


فيْ عيده غَنّت الفَرْحه طَرَبْ واستبشرت به دار
وداره دام هـو فيهـا، نعيـم وْخيرهـا وايـد


تهَلّيْ بْعيده السامي وتسمـو باسمـه المختـار
و(زايد) بالفِعِل زايـد و(زايـد) حبّنـا الخالِـد


أنا اشهد بانّ ذا العالَم إذا بْيـومٍ نـوى يختـار
حكيمٍ يَفْخَر باسمه، نَعَمْ مالـه سـوى (زايـد)







المنهل العالي

قصيدة مهداة لسمو الشيخ محمد بن راشد بمناسبة حصوله على المركز الأول في سباق ماراثون اسبانيا للقدرة




العظيم الله وانا مُؤمـن بهـا كَلمـة عَظيـم
والحياه بْها رسُل مع أنبيا وْصحب وْكـرام


والكتب لي م السَما الإنجيل والعهـد القديـم
والختم قرآن أنـزل بيـن مَكّـه والحـرام


والرسول المصطفى محمد لنا خيـر وْنعيـم
كان أمّي وراعي اغنام وهدى بْنـوره أنَـام


والزمن دولات حكمه بين سين وبيـن جيـم
لارخت في يوم شَدّت حبلها تبغـي المشـام


عدْت اطالع في البدايـه والنهايـه والنديـم
وابن سينا وابن خلـدون وْموطـأ هَالإمـام


البصيره لي تقـود العقـل للـراي السليـم
ما يعرف النور شخصٍ جاهل بْأمر الظـلام


التجارب معـدن الرجّـال بمْحَـكّ الجسيـم
الجسيم اللي يفكّ عْقودها لـو هـي جِسـام


ذاك حتى لو جلـس الـدرب بيـده يستقيـم
واهَنيِّ الأرض تحتـه كـلّ ماعـزّم وقـام


المحمد .. لي بحزمه عِلـم يتسمّـى حَليـم
حِلمه اللي بْحَدّ وبْحَدّه يحِـدّ مْـن الحَـرام


المحمد .. الحكيم اللـي بـه الحكمـه تقيـم
لاعجب لو تعجب السبع العجايب بـه دوام


المحمد .. لو( حدايق بابـل) توازيـه غيـم
له حدايق شعر نرجس ما تغطّيهـا الغمـام


و(المسلاّت) بْعلوّ نجومها رْجـال وْحريـم
ما تعلّت فوق نجمه ساطـعٍ لـو قيـل نـام


وكلّها (اهرامات ) جيزه لي بها السِّر الكتيم
رامها باخلاق سَمْحَـه بَالصـلاه وْبالصيـام


وبرج (بيزا) كان هو يُحْسَبْ عجيبه للفهيـم
وش نسَمّيها بروجٍ ساسها كانـت خيـام؟!


وتاج علمه كالسّحَاب الموشلي مبسمـه ديـم
لو (محل هالتاج) يوقف قال باوقف له نظام


وذاك (سور الصين) شُيّد من زمن قافٍ وميم
عام ميتين وسبعتعشر علـى قيامـه تمـام


سوره الإسلام ممشى والصـراط المستقيـم
كلمته موقف ماهي صوره تعلّـق أو حمـام


و(المناره ) قامها (بطلِيمُوس) بْوصفه زعيم
عام ميتين وْثمانيـن وبقـى منهـا الحـلام


هالمناره لو درت بمحمـد الشهـم الشكيـم
ما اغفلت عن نورها لآخر مواعيد الضـرام


هالعجايب لو هو ثامنهـا باقـول الله عليـم
ما يكنّه من عجايب فـي معانيـه ازدحـام


ودّه وودّه ولـكـن الابجـديّـه كالنسـيـم
ما توفّـي و لا تكفّـي لـو بكفّـه هالكـلام


المحمد .. من علوّه ينهـل البحـر الكريـم
ومن سكوته في سكوته تقرا تاريـخ الكـرام


جيت له داعي أنا ما بين زمـزم والحطيـم
ميم حاء وْميـم شـدّه وْدال رمـزٍ للسـلام








صبري ملّني

لِمِّني فـي مَحْجَـر عْيونـك حبيبـي وخلّنـي
خلّني آشوف نفسـي فـي عيونـك واطمئـن


دامِك إن سَلْهَمْـت بالرمـش الظليـل تْفِلّنـي
(لعنبو) ذا الرمش كيف انّي من اسبابـه أجِـن


حبّك اللِّي تَـلّ قلبـي مـن بَعَـدْ مـا تَلّنـي
صِدْق أنا ميّت بحبّـك كانهـا عيونـك كَفَـن


إجْمَـعْ اللِّـي باقـيٍ منّـي شتـات ودلّـنـي
شوفني ذاك الغريب اللي يـدوّر عـن وطـن


صَدّك اللي هَـدّ حيلـي والجفـا لـي علّنـي
ليـه قلبيـن المحبّـه بالمحبّـه مـا الْتِـقَـن

قلت ابـاصبر والصَبِر من زود صبري ملّنـي
وقلت ابـانسى واثر طيفك صار له عقلي سجن


ضاعت دْروب المحبّه والحـزن مـا ضلّنـي
يا حسافه ذي الليالي.. ذي الليالي ما انصفَـنْ


لا تهلّ دْمـوع مـن عينـك أخـاف تْهِلّنـي
خايف أطْلَعْ من عيونك لا مـن فْـيـومٍ بكن





مستحيل أنساك

مستحيل أنساك هـذا مستحيـل
مستحيـل أنسـاك والله لـلأَبَـدْ

من يعاشِرْ شخص مثلك ما يميل
لا ولا ينوي على غيـرك أحَـدْ


يا جميلٍ في جميلٍ فـي جميـل
يا فريد اللون فـي جيـدٍ وْخَـد


ترتسِمْ في وجنتك شمس الأصيل
وجمرتينٍ بينهـن صَـفّ الَبَـردْ


والعيون الدعج والرمش الظليـل
ونور وجهك منّهن نـور اسْتِمَـد


تهت في حبّك مثل تُوْه الضليـل
وزادت جْروح الَحَشا جْروحٍ جِدَدْ


ولا ولا عن حبّك أرضى بالبديل
وْكَنّ باقي الخود تكمالـة عـدَدْ


لي يسير الدرب يوصَلْ لو طويل
أو مِثِلْ ما قِيْل من (جَـدَّ وَجَـدْ)




عَوّضوك بْغيابي

عَوّضوك ْبغيابي لا تقول انّي َوحَشْتـك
لا تجاملْ دخيلك في شعـور يْعَنينـي

بَسّ يكفي كفايـه لا تمـادى عَرَفْتـك
خَاين الحب مَا له في فـوادي حَنينـي

إنت ياللي بعيني حِلْم عمري رسَمْتـك
وكيف تجرح خفوق يعشقك من سنيني


أحسبه زاد حبّي في غيابي وْحسَبْتـك
ما تجاهَـلْ وِدَادٍ كـان بينـك وْبينـي


كَم سَهَرت الليالي وكم ليلـه سَهَرْتـك
وكم ليله خَيَالك نام في وسـط عينـي


وكم قل لي دخيلك كم ليـل اْنتظَرتـك
كم قل لي تِفَضّل، كم صَـدّك يجينـي


كنت تجري بْدَمّـي لا نزَفْتـه نزَفْتـك
كنت ساكن خيالي، داخلـي مِحتوينـي


من كتَبْ الحـروف الأبجديّـه كتبتـك
"لامَه" إن كان تبغي أوَّلْ الحرف "سيني"




تواق

توّاق لـك أشكـي ولا زلـت فـزّاع
لكـن تبـدلْ حـال وابغيـك تـفْـزَعْ

انت الذي لك رمز فـي كـل مطـلاع
يوم الرجـال تْحيـن (تـوّاق) يطلـع


المجد لك يا فخـر الامجـاد ينصـاع
غصبٍ عليه وتحت رجليـك يِخْضَـعْ


والعز بامرك يا سنـا العـز مطـواع
ومن كان مثلك.. كـان للعـز مربـع


غصت فْـبحور الشِّعر لين اغزر أقواع
ومنزلك عالي.. يا نجـم فـوق تلمـع


الحر في المقنـاص معـروف طَـلاعْ
وانت الفريد.. النادر.. الحـر اْلاروع


كلٍ لـه اعجـازٍ.. وكـلٍ لـه ابـداع
لكنّك انتـه بالفعـل صـرت الابْـدَعْ


لو باكْتِبْ مْن اليـوم ويجـف لِيْـراع
ما اظنّي أحصي كل ما فيـك واجْمَـعْ


ظبيٍ سَرَقْني.. ماخِـذْ القلـب بِخْـداع
حلـوٍ وداده.. لكـن القـول يِـخْـدَعْ


كـمٍ تحمّلتـه وكـم جتنـي أوجــاع
وانا ابتسِمْ له.. كيف والجـرح يوجـع


أبغي دخيلك آخِـذْ الصـاع بالصـاع
آخِـذْ قضايـه ليـن لِعْيـون تِـدْمَـعْ


فزّاع يشكي لـك.. ولا زلـت فـزّاع
لكـن تغيّـر حـال وابغيـك تـفْـزَعْ




ثلاث أيّام

ثلاث ايّام مرّن فـي حياتـي غيـر
ثلاث ايّام عشت الحـبّ واغليتـك

ثلاث ايّام واتهجّـى كـلام الطيـر
كلام أعْذَبْ من اعْذبْ مـن تفدّيتـك

رسالة حبّ شاهدْها غـلا وْتعميـر
على فْوادي تربَّعْ واسْكـنْ فْـبيتـك

أقول إشْ قد انا عطشان وانت البير
دَلو فكري نَضَحْ من كلمتـي ليتـك

أقول ال(ما يصير) لْعينك انت يْصير
ولو حتى بْثرّيـا الكـون حطّيتـك

حبيبي والغلا صوره بـلا تصويـر
صوَرْها بكل رَمشة عين أنا ريتـك

حبيبـي والعطـا يحتـاج للتقديـر
إذا صرّحت أنا اللي حّيـك وْمَيْتـك

ثلاث ايّام مرّن فـي حياتـي غيـر
ثلاث اّيام عشْت الحـب واغليتـك

ثلاث ايّام لكن ما ادري شِ التفسير
بس.. ادري من ثلاث ايّام حبّيتـك





تحلا بعيني

يا مشعل القلب تكفي خفّـف شويّـه
القلب من كثر صدّك ويلـي لْحالـه


دامه يحبّـك ولا لـه غيـرك بْغيّـه
وش له تحطّه بدنيـا الهـمّ وتْنالـه


انته حبيبـي لقلبـي نـوره وْضيّـه
تحلا بعيني وقلبي صِرْت تحـلا لـه


وانته ربيع الخفوق وْشمسـه وْفَيّـه
وان حبّ غيرك خفوقي باقطع وْصاله


ما اريد بك حَدٍّ وْلو هو كان حوريّـه
إنته مهَدّي الغـرام وانـت زلزالـه


للموت انا لك حبيبي صـورةٍ حيّـه
ميّت بحبك وحبّك صِرْت انا اسعى له


يا بو عيـونٍ مثِـل عيـن الدمانيّـه
حورا هَدَبْهـا مظـلّ ودعْـج قتّالـه


كاسِنّك الحِسْـن واوصافـك خياليّـه
ومن راد يوصف جمالك أيتهيّـا لـه


[]


الموعد

جيتك على الموعد ولا جيت // وش عـن لقانـا مانعنّـك

كَنّك عن الموعـد تخلّيـت // يا ويـل يَاللـي عاشقنّـك

ليتك لصوت المغرم أصغيت // أوتـار صوتـه يعزفنّـك

كل حرف منّك يستوي بيت // وارْبَـعْ حـروفٍ ينطقنّـك

ياما على شانـك تحدّيـت // سـود اللّيالـي واسهرنّـك

منّك أنا لا حَـيّ لا مَيْـت // لا مَيـتْ ولا حَـيّ منّـك

يوم بْنِظَرْ عينـي تربّيـت // وامرت بامـرك طايعنّـك

ليـش التغلّـي والتعنّيـت // آهات صدري مـا كفنّـك

لو نِكْ تباعـدت وتقاسيـت // لك في المحبّه عكس ظنّـك

إن كان لي يـوم وتمنّيـت // شوفـة عيونـك طالبنّـك




سرية فكر

سرى فكري وانا (فزّاع) والدنيا بهـا ضَجّـه
واظنّ ان الشِّعِر هاليوم يبى يقضي على حاجه


سرى بْليلٍ وفي بحرٍ يعانِـد غـزره وْلجّـه
يقاوم جرّة التيّار ولـو تطمـي بـه أمواجـه


بحور غْزار يبغيها لأصعـب دَرْب متوجّـه
يبى روس العلا وْيقدر على صعبات اْلِمْواجه


يطول الدرب كم بيطول وحرف القافيه غَلْجَ
هولكن يقدر ان يبني بيوتـه تصبـح أبراجـه


على وصف الجميل الفاتن الساحر لنا حِجّـه
مادام الحب هو ليل المتيّـم أو هـو سْراجـه


عنودٍ رمشها سَلْهَم وعيـنٍ ناعسـه دَعْجـه
وخدّ مْـورّد ومِنْـوِر طبيعـي دون مكياجـه

ووجهٍ من سنا نوره على البَهْجه ضفى بَهْجـه
مزونٍ غيثها البسمه ليا من تضحِك حْجاجـه

وميدولٍ على متنه كمـا داج الدجـى هَجّـه
على عودٍ كما قزّ الحريـر الناعـم انتاجـه

جميل وكل ما فيه الجمال سْكوتـه وهَرْجـه
واذا للزين منهـاجٍ حبيبـي الزيـن منهاجـه

أهو تاج الجمال .. إلاّ مداه اللي تبَـعْ نهجـه
وانا اشهد بانّ حِسْن الفاتنات لْصاحبي تاجـه

تصدّق من كِثر حِسْنِك تصيب بعالمك رجّـه
ولي تبغي له احراجٍ بحسنك تملِـكْ احراجـه

حبيبي لا تلوم القلب ، لوم عْيونـك الدَعْجَـه
بها حاجه ولا ادري وش بها لكن بها حاجـه

دخيلك يا هوى بالي حبيبك في الهـوى نَجّـه
ترى حبّك سبب همّه وصدّك سبّـة ازعاجـه

واذا المطلوب مِ الخَفّاق منّي يطلـب الرِفْجَـه
ورِفْجَه مـا أردّه دام هـذا القلـب محتاجـه




لعبة زمن

لعب الزمن ما هو مثل باقـي العـاب
إلعب على كيفك واذا تـروم لا تْتـوب

بَيْجيك يـوم وْتندفـن تحـت لِتْـراب
عقب الدفن بَتْعَرْف وش يعني لْعـوب

لو نك فَتحت أبواب لك غَالـقٍ بـاب
ولو نك تعرف العيب العيب عَـذروب

بديت أكتـب واجلـب كْتـاب بكْتـاب
آخـذ معَانيهـن واخلّيهـن بْـصـوب

إذا الشِّعر يا ناس قِدْ جاب مـا جـاب
وان جاك شِعري بالفعِل جَاك مَكْتـوب

هذا وانا أرقـى علـى كـل مرقـاب
أسري بليل الضدّ من فـوق عَرقـوب

هذا وانا أشّر وهـي تطيـر أسـرابب
بيض الحَمام تطير ما تحمـل ذْنـوب

هذا وانـا تايـب وإبليـس مـا تـاب
هذا وانا أنعَـت وهـو ضَيّـع دْروب


هذا وانا أضحَك وهو يضحـك بْنـاب
ثوبي ستير وصاحبي عَـاري الثـوب


هذا وانا اعـدّ الخَطـا عَـد لِتْـراب
ينعد كيف انعد وهـو كـان محسـوب


بعض البشر تحسب على كيف الاسباب
وبعض البشر من دون سِبّه ومطلـوب


كلٍّ يحَسْب احساب وآنا احسب احساب
وْكلٍّ يجي باسلوب وآنا لـي اسلـوب


بَابٍ فتح مـن بَـاب والبـاب كَـذّاب
بَابٍ إذا يفتح تـرى البـاب مَكْـذوب


هذا وانا اغنّـي وانـا اقـول سَحّـاب
سَحّاب يَمطر صوب وانا أمطر بْصوب


مثل العروق تجيس وتدق الاعصَـاب
أو مثل سَاحِر طار في الجو مجلـوب


من هو يأمِّن يمشي بْليـل فـي غَـاب
بعض العَسَل يا صاحبي سَمّ مَشْـروب


هذا هَدفيه صبتـه وْصَـاب بصـواب
صوب الذي صَوَّب ولا صاب مَصيوب


بحرٍ غزير وْطامـي البحـر عَبّـاب
ونَارٍ تطَفّي نَـار مـن حَـرّ لاهـوب


حَـدٍّ عليـه عيـون والنـاس رقّـاب
وْحَدّ اختفى لو كان بالحيـل مَرقـوب


حَدٍّ يشلّ سلاح وْحَـد شايـل حْـراب
حَدّ يعشق شْروقٍ وْحَد يعشق غـروب


حَدٍّ يشيل الهَم في ضَـرب الاصحـاب
كل من ضَرب في يوم له يوم مَضروب


أنـا معَـادِل آخـذ الحُـب لاحبـاب
وْكلٍّ يحب الطيب .. الطيب محبـوب


قالوا سَهَـل إنّـي أنـا أفتـح البـاب
وانا هويت الصعب لو دارت حْـروب


لعبَه وانا ألعَب علـى كـل الالعـاب
طبعي أنا غَالـب ولا آكـون مَغْلـوب




معذور

البارحة قطر الندى أوشى على العيـدان
انقلت الله أكْبَرْ ما على بعض الوشاةْ قْصور


قلت الله أكبر كيف أرَجّح كفّـة الميـزان
كيف أقْدَرْ أنْظمهم وانا باثنينهـم مَجْبـور


مَسّيتهم بالخيـر وْ حِنّـا حَـزّةْ مْسَيّـان
لكنهم عن عمـد قالـوا يا صباح النور


الأوّلي معـذور لاْن القلـب لـه ظميـان
والثاني أظماني .. ولكنّـه بَعَـدْ مَعْـذور


لو أكْتِبْ الأشعار انت تْكون لـي الاوزان
ولو تنكسِرْ الاوزان يحلى بك وزن لِبْحور


من شاف حسنك ينكسر طرفه وهو حَيْران
يرتد من دونك طرف عينه وهو مكسـور


سبحان لى ميّزك عن كل البشر سبحـان
الرمش وارف والعيون الحور تلعَبْ دور


والله انا شفتك ولا شبّهـت بـك إنسـان
ظنّي أخذت الزين كلّه من بنـات الحـور





أمجاد

الشِّعر له أمجاد والبيت لـه مجـد
ومن هو يروم يوصِّل الشِّعر مجـده


الشِّعر له ميزه وفـي ميزتـه عـد
ياما شويعر إنجلـب شِعِـرْ ضـدّه


لا تقسم الخفّـاق القلـب مـا يْبِـدّ
وراعي البدايه في هوى الشوق بَدّه


في فرق بين جْبال وفي فرق في النَّدْ
سهلٍ رقاها بس فـي الفـرق مـدّه


واذا تسنّ السيف في موعـد الحـد
ردِ السيوف ورد سيفك فـي غمـده


خَلّك شجاعٍ لا تْعَرِفْ حر لا بـرد
لا برد حرّه ولا بَعَـدْ حـرّ بـرده


وانا فهمت الشِّعر هو ما يبـي قَـدّ
إنت الذي ترفـع لـه الشِّعـر قَـدّه


إن فاض سيلك فايض السيل له سد
وسـدٍّ يسـدّ السـدّ وسـدٍّ يـسـدّه


وان كان المطوّع ولا طاع وارتـد
يا هي حسافه كيـف طايـع وردّه


ما يردّه إلاّ ناعس الطرف والخـد
ودّه يحـاول يوصـل الخَـد.. ودّه


إن جيت أطالع عيني بْعينـه تسـد
بس يكفي انّي شفت عينـي بخـدّه


هذي مشاعر شوق والحـب والـود
يبغي يغيب بْعيـد والشـوق عنـده


في بسمتك (عَـزّام) يتفتّـح الـورد
كن المطر نازل علـى أوراق ورده


يا ما أضيع بشوق في ليـلٍ اسـود
ويا ما يضيع الليل في شَعَـرْ هَـدّه


يلعن مشاعر لا تجـي مَـدّة اليـد
يوقف خفوقي يوم مـن بـس مـدّه


هذا بَحَرْنَا يْسَاوي الجـزر والمـد
كلّي تسـاوى بيـن جـزره ومـدّه


الشِّعر له أمجاد والبيت لـه مجـد
وهذا يروم يوصّـل الشِّعـر مجـده


فاءٍ وراها زين ومـن عقبهـا مَـدّ
وعينٍ وْرِدّ الزين وْعَ الزيـن شَـدّه




قلب صادق

لا تقول الحب فـي القلبيـن مـات
هذا توّ الحـب كيـف انّـه يمـوت


ولا تقول ان الشِّعْـرِ ليـل امنيـات
وانت توزِنْ بيـت وتكسِّـر بيـوت


الشِّعْرِ نبـض القلـوب الصادقـات
كم رفعنا به على طاريـك صـوت


لا تخلّينـا علـى بحـر السكـات
الكلام أحيـان أفضـل مِ السكـوت


خَل ما بينـك ومـا بيـن الوشـاة
مثل ما بين (الرباط) و (حضرموت)


دامنـي لجلـك نـذرت المقبـلات
لا تخيِّبْ لـي ظنـون ولا نعـوت


خِذْ مشاعر قلبي الصـادق وهـات
ودّ صادق واحذَرْ أقـوال الشمـوت


احْذَرْ احْذَرْ والدهـر لـه نايبـات
واحْذَرْ انت تطيح شَبْـك العنكبـوت





فزّاع يضع إحدى روائعه على طاولة الشاعر محمد المر بالعبد..مع «كسرة الوادي»..
كسرة الوادي.. ومحمد المر بالعبد

يموت يْموت لي فاتِك وتحيا لك عـروق جْـداد
غريبه كيف يا (محمّد) بنفس الروح تحيـا لـك


علـى الله مابقـى إلا أخلّـي العقربـي يعتـاد
على ليلي لعلّ الليـل لـو مظلـم بيصفـا لـك


مزون وْبرْق سحّاب ومطرها في سمـا رعّـاد
تشوف مْزون تمطِر لك غـلا لكـن تهيّـا لـك


علوم الوقت تاخذ من علوم النـاس قـل أو زاد
تضيّعك بْهواها ثم تضحـك لـك وتلجـا لـك


زمانٍ مَرّ في الدنيا على (عنتـر) ابـن شَـدّاد
يا (عنتر) ما اعترفنا بك ياْلين اثبَـتّ بافعالـك


يا كم واحد على خيله يزرّ شْـداد فـوق شْـداد
يزرّ ابطانها والفـذّ يضحـك والضلِـع هالـك


يقولون أعلى ما بالخيل تركبهـا عنـاد عْنـاد
وانا اقول أعلى ما في الخيل في بالي وعلى بالك


أراضي واسعه تجذبْك وانته مـا لـك إلاّ بـلاد
بلادٍ عِرْقها عِرْقِـك بالاحـرى عمّـك وخالـك


عرفنا (كسرة الوادي)، ولكن لو يفيـض الـواد
نصنّع لـك مساييـلٍ تركناهـا وْسمَحْنـا لـك


نحِن لا من بغينا الشيّ صرْنـا للسنـاد سْنـاد
نحِن مَدّك نحِن جَزْرِك نحن بَحْرِك نحِن فالـك


نحن منّا الكـرم منْبَـع ويـا كـم بابنـا ورّاد
نحن لو جيتنا ضيفٍ قبِـل تدخـل وقفنـا لـك


يموت يْموت لى فاتك وتحيا لك عـروق جْـداد
قبل تنْشِد عن احوالي أقوْلّك إنـت وش حالـك





الجوال

لا تحسِبْ وْرود تنثَرْ لـك غـلا وتفلّـه
والبَحَرْ عشرين وِنْجومه وْضِحْك هْلالـه

تعتقد إنّي أنـا مَيِّـتْ .. وانـا لا واللّـه
آنا لا ميّـت حبيبـي لا ولا اللّـه قالـه

لى يبي يقرَبْ خفوقي مـا يجينـي بْزَلّـه
زلّةٍ أسْمَـحْ لهـا ومـن عقبهـا بِزْوالـه

كان عندك هرج بتْقوله لقلبـي قِـلْ لـه
وش علينا بْهَرْجة المسكين واللـى قالـه

ما عرف شَيٍ في بالي لا بغيت أوصل له
ويذكر اسمي يومهـا وبحلّـه وبترحالـه

من يحب بحب ضايع قلـت اللّـه شلّـه
ضاع واللي ضاع عندي إحتيـاط بْدالـه

والله لا احذفه أنا ويصير حـرف العِلّـه
يالين ما يضحَكْ عليه ابليس قبـل عْيَالـه

لي (مَسِجْ) يكتب في بالي وعقبها أرسل له
ويدخل بْشاشات حبّـه وينحـرِقْ جَوّالـه

مـن خبالـه إلْخبالـه نيّـةٍ نـاوٍ لــه
ولا بغيت ازيد شاف خْبال غيـر خْبالـه

أرفعـه وارجـع أذلّـه وارفعـه وآذلّـه
لين أسمع مرّتين بأذني يـا هـي حالـه

ولو بغاني هو رقى لي والاّ انا ما انزِلْ له
لا له انزِلْ لا له ولا ألـف مـن أشكالـه

ذا طريقي من عرفتـك والطريـق تْدلّـه
الطريق اللي تدلّـه لازم ان تسعـى لـه

خِذْ من الشاعر كلامـه والاّ حبّـه خَلّـه
أنا آحبّك .. لا حبيبي لا ولا اللّـه قالـه

[http://www.flickr.com/photos/muhanne...y/2258454844/]
نخوة قوافي

يا مسا السكّر على الغصن الرطيب
يعل تسقي ديرته وبل السحب

زارني والفكر ساري سري ذيب
قلت سبحان الذي ساق ووهب

قلت ياليل اللقا والشوق طيب
طيب لاصحاب الحسب واهل النسب

القوافي تنتخيني قبل اثيب
وما على سنّي من اشعاري عتب

إن بدعت الشعر سِنّي ما يعيب
من صغر سِنّي وانا قافي عجب

القوافي بَدعها حظ ونصيب
بس انا حظّي على القاف انتصب

إن صعب قافي ترى فالي يطيب
مطلب افكاري هو القاف الصعب

دامني في صغر سِنّي قبل اشيب
أملي الدنيا زغاريد وطرب

ما عليّه لو غدى شكٍ وريب
وش على الصادق إذا الحاسد كذب

دام فعله دون قولي ما يصيب
كيف لو فعلي على قوله وثب

ظنّ بي ظنّ الحسود المستغيب
وابتليته بلوة السيف الحَدَب

قمت اجيب اللي عجز عنّه يجيب
ما قدر يكشف عن عروق الذهب

كيف الوم اللي نظر عينه عطيب
ما يميّز بين زرفال وخبب

المعاني بدع فكري واللبيب
يدري ان الراس ما يتبع ذنَب

الشعر ماهوب لامثالي غريب
لاني بحاجة من احتاج وكتب

وارثنّه هوب في حاجة نسيب
الضعيف اللي إذا احتاج انتسب

وانت يابو نصّ ظن ونصّ عيب
لا تسال الكرْم عن لون العنب

لا تسال الشط عن موج الغبيب
البحر مايرحم صغار الخشب

والعرب ما تفخر الاّ بالنجيب
واشهد انّي عندهم عِزّ الطلب

وانت يالمحبوب لك ربّ حسيب
لا يغرّك من تباعد واقترب

وانت لو تخطي على قلبي مصيب
صابني من بَيّة عيونك هدب

إن رماني رمش عينك يالحبيب
جرحك علاجي وانا ادوّر سبب

إسأل مجرّب ولا تسأل طبيب
العَرَب ما تفخر الاّ بالعَرب



قصيدة ساجدة

لك حروفي قصيـد ولك قصيـدي شـعـــور
ولك شعــــوري خفـوق نبضـه الحَيّ إنتـي

ولك غلا في صَميم الروح حَاضر حضور
واشهـــد انــك بقلبي وْلا عـن العيـن غبتي

يا سَـــنا الكــون كلّه والعــواطف بحـــور
يا ظيـا العيــن ياللي في وَسَطـــها سـكنتـي

يا بَعَد كـــــل من لي يا أريج الزهــــــــور
يا أعـذب حروف تظهر في كلامي وصمتي

يا شعـــــاع تحلّى وْلا على الـــنـور نـــور
بـس مـا غيـر نـورك يظهـــر ليا ظـــهرتي

ويْا ملاكٍ خلـقـــه الله لعـمـري ســــــرور
وش تفيد الحيــــاة بْــيــوم لا من زعَـــلتي

أعتذر لك ياعمري ولو بعــــذري قصـور
وانتي قدرك عَ راسي وْلا حشا بيـوم هنتي

إبسمي يعل ربّي يحفظـك م الشـرور
تبتســــــم لي حـَيــاتي وقت فيه ابتسمـتي

ان زعلتي عَلـّـــيه كن كــــوني مهجــور
وان رضيتــــي تسـابق ابتسامتي فرحـتـي

إنحنَـتَ لك قصــــيده ساجـــدة ع السطـــور
كــثر مـا انتي بمَـكه يا اطـهر الناس طفتي




ثمــــار الهـــــوى

ليــتك معي يوم الهـوى نود نسناس
من الــفرح والله ما تـدمـــع العـــــــين

نــاس على تعذيب ناس لهـم نـــاس
وهــذا الهـوى ياخـــذ قــلـوب المحبين

لكن لا يطري على بـــالك الـــــيـاس
ذوق الهــوى دامـك تعيش العمـر حـين

خذ من عطر ورد مع طيب الانفـاس
واقطف من اثمار الهوى في البساتين

خلك مع حلو اللما عـذب الالعــــاس
الجـــادل اللــــي فايــــق بكـــــل تكوين

لا تحط نفسك بين وعـرات الاطعاس
وافهــــم بــأن الحــب عـذب مــلاييـــن

الحــب مــرجع للمحبـيـن واحسـاس
والحب هـو فـي قـلب الاحـباب نوعين

ع كيف ما تبغي لك تـدق الاجــراس
والشـــــاطر اللي يمـــلك الحب بيدين




الاخير .. والاولاني

الحب ما يسكن قلوب ومحاني
الحب أسمى عاطفة تسكن الروح

ياحبك اللي كل ما أظمى سقاني
سراب لال ودرب مهجور ونزوح

ما أقول منك اللي لفاني كفاني
لأني أحبك هجر وعناد وجروح

ان غبت عني طال عمر الثواني
تقول عمر الثانية من عمر نوح

وان جيتني مرت ليالي زماني
ماكنها الا البرد بعيوني تلوح

قبل الجفا عذرك سبقني وجاني
لاتعتذر عذرك من العام مسموح

أبني على شوفك صروح الأماني
وشلون ماتبني على شوفي صروح

ان كان غيري عوضك عن حناني
ماعاضني غيرك من الغيد مملوح

انته الأخير... وانته الأولاني
لوكان حبك حد قلبي على الصوح

كتمت سرك لين دمعك عصاني
راعي الهوى لويكتم السر مفضوح

لا تلوم قلب (ن) جر فيك الأغاني
حتى الحمام يجره الشوق وينوح




طاحت الحيّه

هلا باللي سبى قلبي واخذنـي حسنـه بقـوّه
سَلَبْ روحي واخذ صبري وأنفاسي من يْديّـه


أحسّ انّه لعب بالقلـب لعبـة شاطـر وْمَـوّه
يبعثرني.. ويجمعني رجـا واحـلام ورديّـه


إذا نوّر ظلام الليل عرفت ان الفجـر ضـوّه
تبسّمْ من جبينه مبسم الصبح وضحـك ضيّـه


واذا سلهم برمشه طرت من جَوّي إلى جـوّه
ورحّب به خفوقي غصب عنّي قال يـا حَيّـه


أثاريني بحسنه طحت وانا اظن الهـوى تـوّه
فكيف ان الهوى توّه وانا غرقـان فـي طيّـه


تعلّقته وصار اليـوم نـوّ القلـب مـن نـوّه
مع انّي قبل هـذا اليـوم كانـت نيّتـي نيّـه


قبل يطري الحسن حسنه لفظ قبل اسمه سْموّه
تسامت به سنا الحسن وسرت له سحب وسميّه


تقول ارفق بمن حَبّك وعقب اللي تبـي سَـوّه
ترى ميْتك إذا شافك ترد الـروح بـه حَيّـه


حبيبي خاطري عن ما بدا لـه عبّـر وْنـوّه
ومن شرواك يفطن وانت شمس الخاطر وْفَيّه


إذا كان الحيا يمنعـك.. مـا تمنعـك لِمْـروّه
واذا خايف من الحِسّاد قِلْ لي.. طاحت الحِيّه




بحور

صغت المعاني من بحور الهواجيس
واخترت منهن من صفا نقو الألماس

بيوت شِعْـري يسبقنّـي مراميـس
وبهن أحرّك نبض قلبي والإحساس

سايرتهن يـوم الخلايـق مناعيـس
ونظمت نظم القاف ساسٍ على ساس

واجدّ في سيري على ضمّر العِيْـس
واسري بليله سرمديّـه بالاغـلاس

ما همّني طول المدى والمراويـس
ضاري على فعلٍ يحيدونـه النـاس

أغوص قوعٍ مـا تجيبـه مقاييـس
آخِذْ من الدانات ما يْصيبني يـاس

وان هيّضنّـي قايـدات المكانيـس
أحسّ في قلبي شرى دَقّ الأجـراس

أنا الهواوي ما على القلب تحميـس
أطْلِقْ عنان الشوق وأقول لا بـاس

طبّ الأمور المقفيـات المناحيـس
وانظِرْ بعيد وطاوِل النجـم بِقْيَـاس




ندى الريحان

يوم أقْبَلت تخطب ندى الريحان لطف وخفّه
ما كنّها إلاّ الصبح يوم أقْبَلْ يجـرّ أقدامـه


تحفة حسن من حولها غيمـة غـلا ملتفّـه
كل الحلا محبوس بيـن أقدامهـا والهامـه


كَنّ الثغر منها نهر والاَّ الشفايـف ضفّـه
ما شفت في عمري نهر له ضفّـةٍ بَسَّامـه


يحتار فيها من نظر لو هو صِدَقْ في وصفه
ويكذّبه لي ما نظر واللي نِظَرْ مـا لامـه


تحفة حسن لاقت بعين اللي يعرف التحفـه
ويسوم عمره لاجلها لولا الغلا مـا سامـه


بعض الصدف فيها حلا يا ما حلا هالصدفه
وشلون ما يرتاح لي صادف فتاة أحلامـه


ويزفّهـا بايقـاع هـادي للحنايـا زفّــه
ويعيش معها ما بقى له من جميـل أيّامـه


وِيْعَاتِبْ أوَّلْ سِيْنها لانّـه تصـدَّرْ حرفـه
مع ان أوَّل اسمهـا سينـه تصـدَّرْ لامـه





الفصول الأربعة

أنسـاك كلمـه مالهـا أيّـة وجـود بمرجـعـي
والقلـب لامنّـه نـوى غيـرك حبيبـي بامنعـه


تنتابني ذكراك مـا بيـن الوعـي والـلا وعـي
ما كنّك الاّ بحـر حلمـي والمشاعـر الأشرعـه


من وين تطلع كنّك الاّ تقول يـا شمـس اطلعـي
يتنفّس الفجر بنفـس حسنـك ويشـرق مطلعـه


مع إن فرعك لو رميت الشمس بـه عيّـت تعـي
إن الدجـا يسـري لهـا مـن دون مـا تتوقّعـه


إن الدجـا يكنـز عبيـره للنسـيـم المطلـعـي
كلّه على شـان النسيـم المطلعـي يلعـب معـه


يمتد ليلي واشعلـك شمعـة غـلا بيـن اضلعـي
ويمر بـي طيفـك ويتناثـر بصـدري واجمعـه


تحتاج تتعبني وأنـا أحتـاج لـك وأنتـه معـيب
عض المشاعر تتعـب المشتـاق لكـن ممتعـه


موقعك مـن قلبـي تدلّـه بـس حـدّد موقعـي
وبعدين خذ قلبـي وفـي دنيـا غرامـك ضيّعـه


وإن طاب لك شوقي وطاب لصوت همسك مسمعي
القلب لك والشوق فـي عروقـي بكيفـك وزّعـه


القلب ملكك والفصـول الأربعـة مـن مطمعـي
دام التقت في مبسمـك كـل الفصـول الأربعـه





مدخل غرامي

القلب شال الحـب والحـب شالـه
مدخل غرامي والأحاسيس حولـه

وضاع الفكر ما بين حاله وحالـه
واسهل حلوله صارت أصْعَبْ حلوله

الحِسِنْ لي يفرض علينـا سؤالـه
كيف الربيع امتد لاربـع فصولـه

كيف ابتداه الحِسْن ثم انتهـى لـه
يا لين حتى الحسن منّـه خذوالـه

وانا اتخيّـل فـي خيالـي خيالـه
فرصة عمر تحت ابتسامة طفولـه

غرٍ صفا حسنه وقلبـي صفـا لـه
سهل التمنّي بس صعـبٍ وصولـه

يحتار فيه اللـي يوصّـف دلالـه
ويهين به لي عن جماله حكوا لـه

يخجل جماله من صفـاوة جمالـه
ويغيظ ربّـات العيـون الخجولـه

يمشي معاهـم بـس كنّـه لحالـه
معهم ولكن كن هم لي مشـوا لـه

والي تعرّض فـي مرامـي نبالـه
والله ما يكسـب ولا ربـع جولـه

عادل ولكن مـا برمشـه عدالـه
يظلـم مجبّينـه برمشـه وطولـه

أصلاً جنوني بس في حَـب خالـه
وشلون لا باوصف تفاصيل زولـه

إن قال صَـدّي.. قلـت: لله قالـه
وان قال وصلي قلـت: بالله قولـه

هذا الذي قلبي من الشـوق شالـه
مدخل غرامي والأحاسيس حولـه




قراءة مدى

دنيـا ودانـي مواطيهـا ترفّعـهـا
والقرم يرقى بعزمه عـن مواطيهـا

القرم يفرض عليهـا أمـر واقعهـا
يجرح دروبه لاجل يرجـع يداويهـا

يرقى واذا ضاقت دْروبـه يوسّعهـا
ويعق فيها مع انّه مـا طمـع فيهـا

لان المطامـع يثيـر الشـك دافعهـا
مثل الفَعَى يوم تسمع نـاي حاويهـا

لا هو سمعهـا ولا قصـده يسمّعهـا
ولا قصده إلاَّ تناظر ميـل راعيهـا

يطلـع بطلعـه ولكـن مـا يطلّعْهـا
بعض المظاهر تزخرف لك مراميهـا

وشلون ألوم المظاهر والعـذر معهـا
والعقربي ما قـدر يكشـف لياليهـا

أهل المطامع تغطّي لـك مطامعهـا
والوقت يقـدر يبيّـن لـك مغازيهـا

من حكّم الظن فـي الدنيـا يضيّعهـا
ومن حكّم العقل يكسب فـي تواليهـا

ومن أشعل النار لا يامِنْ مواضعهـا
(النار ما تحرق إلاَّ رجـل واطيهـا)

والنار أطفت وانا ما اريـد أوَلّعهـا
واذا ارجعت ولّعت أرْجَـعْ واطَفّيهـا

والبسمه اللي لذيـذ الزيـف وزّعهـا
أقـرا مداهـا واترجمهـا وامشّيهـا

وِحْروف ما بين الاسطر سهل تجمعها
لكن من الصعب تستوعـب معانيهـا

قليل من يدرك الفرصـه ويصنعهـا
يجـري بمبـداه والدنيـا يجاريهـا

بعض الفرص تغتنمني لاجل أضيّعها
واصنع فرص تغتنم من طيب راعيها

هذا وانا اعزّ نفسي فـي تواضعهـا
واقـدّر النـاس قاصيهـا و دانيهـا

والناس ما تحفل اللي مـا يصانعهـا
وتعيب في بعضها لو كـان غاليهـا

تنسى وتذكر علـوم اللـي يطابعهـا
واذا اختفى يختفي عن ذكر طاريهـا

تتبع خطا من هـو يْحَـاوِلْ يمتّعهـا
وتقول مـا لا تكنّـه فـي خوافيهـا

والناس تشكـي لحاميهـا مواجعهـا
وشلون لو صار حاميهـا حراميهـا

[http://www.flickr.com/photos/muhanne...y/2257653829/]

ثقة زايد

لأنّ الله خلق للمجـد مـن روس الرجـال رجـال
ماهوب كل المتون اللـي تـزمّ الحمـل تقـوى لـه

ولا يقـوى علـى حمـل التعـب ويْحَقِّـق الآمـال
سوى (محمد ابـن زايـد ابـن سلطـان) وامثالـه

يمينـه فخـر واكـرام ويسـاره عِـزّ واستبسـال
ولا منّـه فَعَـل يشهـد لـه التـاريـخ بافعـالـه

ولا منّه وعد يوفي، ولا مـن قـال.. قـال وْطـال
يِعِزّ المجـد لا قـال وْيزيـد المنصـب ان طالـه

يقولون الفخر له لـو لبـس فـوق الجبيـن عقـال
وانا اقـول الفخـر ماهـوب لـه.. الفخـر لعقالـه

هذاك اللـي زَرَع لـه فـالقلـوب الطيّبـه تمثـال
تمنّـت كـل نجمـة توصلـه وتصـيـر تمثـالـه

لأنّ اللـي مثـل قَـدره ليـا منّـه رقـا وانـهـال
يطيح من الثرى صوب السمـا، والنجـم يرقـا لـه

وليـا مـن عَـوّت للفخـر بالأعمـام والأخــوال
يجمّلهـا مـن الصوبيـن باعمـامـه وباخـوالـه

كثير افضال، وشوي ان وصفنـاه بْكثيـر افضـال
حشا نفـس الفضايـل نفسهـا مـا تعمـل اعمالـه

إذا الله خالـق العِـزَّه مراتـب والعبـاد خْـصَـال
أبا اعرف هو بقى يا اهل الخصال اكرم من خصاله؟

كثيـرٍ.. مـا بعـده الا المطـر والغيـث والهمّـال
غزيرٍ.. ما حسـده الا البحـر والمـوج واهوالـه

قويٍ.. ما يهـاب مـن الحـدو والخيـل والخيّـال
شجاعٍ.. يرعـب قلـوب العـدو لـو إنّـه لحالـه

إذا عرش البطولـه مـا يليـق الاّ علـى الابطـال
من ابطاله إذا انتم يا "محمـد" مـا انتـم ابطالـه؟!

هنيّالك ثقة "زايـد" سَنَـد، واسـم، وذرى، وظـلال
وهنيّالـك علـى حمـل الثقـه واسمـك هنيّـالـه

خذ حروفي وانا "فزّاع" ما عقـب الجـزال هـزال
لأنّ الشعـر بامثالـك تصيـر هـزالـه جـزالـه

قصيـدٍ ينذبـح يفـداك، تنعـاه الرفـوف اجـيـال
وحـرفٍ ينولـد لرضـاك يحلالـك وتحـلا لــه

رعودك.. أكّدت للغيـم إن اصـل المطـر رجّـال
سجودك.. يثبت ان الديـن يبقـى صلـب برجالـه

وجـودك.. أثبـت ان الله خَلَـق للعنفـوان اشكـال
صعودك.. أثبـت ان اللـي تنالـه مـا حـدٍ نالـه

أعـرف ان السنيـن تـزول لكـنّ الأمـل لا زال
وقليل من المتون اللـي تـزمّ الحِمـل تقـوى لـه

ولا يقـوى علـى حمـل التعـب ويحَقِّـق الامــال
سوى "محمد ابـن زايـد ابـن سلطـان" وامثالـه




ديمقراطي

تصدّق ما بقى له شيّ فـي بالـه مـن الأفكـار
عجز يخفيه في صـدره كـلام الحـق ويلمّـه

عجز يقطف ورود الفـل ويظلـم وردة النـوّار
لاجل ما يكسب الآذان يطـري لـه ولـد عمّـه

إذا ما عاش ليله ليل ولا عـاش النهـار
نهـار ليا صبحه غدى ليلـه ونـور الصبـح مظلمّـه

واذا ما عاش مستقبل يعيـش اليـوم بالتذكـار
يعيش الحاضر الماضي يهمّه بـس مـا يهمّـه

ديمقراطي يعبّر عـن كلامـه عـاش باستقـرار
يـومّ القلـب لافكـاره واذا ومّ الفكـر ومّــه

وانا ما جبتها لك سحب إلا في سمـا الأمطـار
سحابٍ لا بغـى يمطـر دموعـه إندفـق دمّـه

سحابٍ من دموع الموت هالك يـروي الأنهـار
روى نهره ونبت وردٍ عجز يقطـف ولا يشمّـه

جبل صامد قوى عزمه كبر حتى بـدى ينهـار
عقب ما كان في العالي تهاوى من علـى القمّـه

بدى يصغر يالين أصبح حجر يلعب بيدين صغار
تبعثر والطفـل ينثـر حصـاه ويرجـع يلمّـه

نصيحه قلتها إحـذر تعاكـس جـارف التيّـار
صعب تامّن في بحر الوقت لاموجـه ولا يمّـه

ونصيحه لا تذيكا لك على ناس اذكيـا شطّـار
ترى بعض البشر تحسب بلا روح وبـلا ذمّـه

وانا لا ما عليّ الاّ أقـول الحـق مهمـا صـار
تريد الحق خـذ قولـي ولا تاخـذ ولـد عمّـه

أنا قلت النصيحه لك واعيد الـدار غيـر الـدار
وافاعيهـا تريّـا بـس لحظـة غـدر وتسمّـه

أنا ما جبتها لك سحب إلاّ فـي سمـا الامطـار
واذا زمّ البحـر موجـه لـك الله ردّهـا زمّـه




فخر الأجيال

على وصف الرجال اللي تسمّى بالفعـال رجـال
لفت بيـض العلـوم وبيّـض الله وجـه راعيهـا

لفت ما كنّها الاّ سبّـق الخيـل ان بـدت تختـال
نواصيهـا النعـوت وفـي مناكبهـا.. قوافيـهـا

قصايد والقصايـد مـا نساومهـا بجـاه وْمـال
نعـبّ بحورهـا وان هـاج مزملهـا نرسّيـهـا

إذا امتدّ الفكـر وامتـدّ ليلـي والقصيـد وطـال
توشّحـت الشـوارد ولبسـت الاشعـار غاليهـا

كذب من قال ساعَفني عليهـا الجـن يـوم تقـال
أنا البـس جنّهـا واصـدر مواردهـا واروّيهـا

أنا وْلا فخر نجـل الشامـخ المتمـرّس الريبـال
على وصفه تجارينـي القصايـد قبـل اجاريهـا

على (محمد إبن راشد إبن مكتوم) طـاب الفـال
وطابت لـي قبـل لا الـزم قوافيهـا.. معانيهـا

متى قالوا صواريها المعاني.. ما هنـاك اشكـال
حـرام انّـي لمـدّ شراعهـا لأكبـر صواريهـا

على اكبر منبر ارميها ثنا وْعز وْفخـر واجـلال
ما دام ان الثنا لأهله.. على اكبر منبـر ارميهـا

لاجل قرمٍ غرس حلمه لشعبه واثمـرت الآمـال
حقايـق نبصـر اوّلهـا.. ونتبـاشـر بتاليـهـا

حقايق واضحه من دون ابو راشد صعب تنطـال
تباركهـا القلـوب وتبهـر النـاظـر مغانيـهـا

مغانيها تراود كل عطـرٍ مـا خطـر ع البـال
واراضيهـا يـراود كـل عاشـق فـوع ناديهـا

أراضيها الخزامـا والنفـل والبختـري والهـال
وما يخطر على بال العطـر يزخـر باراضيهـا

ولي فيها محب أسرف على قلبي وحـط وشـال
طلب روحي وروحي منـه فيهـا اللـي يكفّيهـا

من اوّل ما عرفته والضلـوع تجـرّ لـه مـوّال
ولا ادري نيّته بضلـوع صـدري وش تواليهـا

أنا محتـار مـا بينـه وبيـن (دبـي) بالمثقـال
يا أمّا (دبـي) لـه تحـلا أو انّـه لـي محلّيهـا

أو انّ (دبي) تحلا لان أبـو راشـد لهـا خيّـال
نعـم والله وتسبـق خيلهـا مـن سبـق واليهـا

دبي العِز مـن طيـب النسايـم عودهـا ميّـال
تمسّي صاحـب القـدر ونحـن باسمـه نمسّيهـا

صدى داره بشرق وغرب وجنوب التقى وشمـال
قبض الاربـع جهـات يليـن داره ذاع طاريهـا

طغى عزمه على وعر الدروب وله غدت مسيـال
تسيل الأرض لاقدامـه وتفخـر مـن مواطيهـا

غريبه كيف جادت بـه سنينـه والسنيـن بخـال
والاغرب كيف تضما له وهـو بالجـود يسقيهـا

لو ان المجد سهل ان كان كلٍ طـال منـه وْنـال
دروب المجـد ودروب العـلا صعبـه مراقيهـا

طويل العمر ما جيت اعتزي في وصفك الأمثـال
ولكـن المثايـل تعتزيـنـي بــك.. والبّيـهـا

يابوي ابشر ترى شبلك توارت عن مـداه اشبـال
وثب فوق الـدروب وسابقـت رجلـه خطاويهـا

ورث عزمك وحزمك والخصال تجرّ طيب خصال
مواثيقـه علـى طـرق المكـارم بـك يجدّيهـا

إذا شدّ الفخر لاجلك رحاله قمـت اشـدّ رحـال
على نهجك.. عشان افرد رحاله وارجع اطويهـا

واذا قالوا: من ادرى بالحصابي والـوزون ثقـال
عرفت ان الوزون ثقال وانـت ادرى بْحصابيهـا

على الدنيا جدال الاّ انت والله مـا عليـك جـدال
مع ان إيـدك يجـادل كـل وادي سيـل واديهـا

لو ان السحب تنشا من كفوف امست عليك ظلال
وخرّت ساجده لاهل الثرى مـن جـود منشيهـا

مكارمك المكارم والعطايـا مـن بحـرك جـزال
لو ان السفن تجري في يمينـك ضـاع شاطيهـا

يمينك كم لاحت وابرقت وابطـت وهـي تنهـال
ولا والله تـدري عـن يسـارك كـم معاطيهـا

وكم رجلٍ بصدره حاجه وجاك وقبـل لا يسـال
عطيته.. كنّـك ادرى بالصـدور وْسـرّ خافيهـا

وكم حلمٍ سبقته.. كان في عيـن الزمـان محـال
تقول المقبلات افضـل عليـك اسـرار باريهـا

يقولون اختصرت اجيال واقول انته فخر الاجيـال
إذا الأجيال بك ما تفتخـر.. مـن يفتخـر فيهـا




قدّها وقدود

صدق من قال يا محمد بأنك سيف ما تنصـد
مرواتّك علم خفاق وفيك المرجلـه والجـود

يا بن راشد وابو راشد بنيت امجاد لك تشهـد
تجف أقلامي بمدحك,يحيـر العـد بالمعـدود

إذا منك بغيت الشي فـلا عنـه مـرد وبـد
تطول اللي تقوله عـز وانتـه قدهـا وقـدود

أشوف النجم ذاك بعيد,و أنت من النجم أبعـد
ألا يا حظ أبو من هو تكون انته معه موجـود

إذا اسمك يجي في الشعر يزيد البحر مده مـد
يزيد الشعر في الشاعر تجيه أبيات دون حدود

مروض جامحات الخيل,مهدي الموقف المشتد
مفرج كربة المظلوم,وشوق الفاتنـات الخـود

أحد مثلك أنا ما القى رجل مثلك أبد مـا حـد
على شعبه سطع نوره مثل بدر اليالي السـود

أنا لاجلك كتبت الشعر وفضلك سيدي ممتـد
على طول المدى نبقى لشورك طايعين جنـود




وشفيه بالك

وشفيه بالـك بعيـد وجالـس تفكـر
بدري على الحزن توك في بداياتـك

لاتحسب الوقت لي فاتـك وتتحسـر
عمر الندم مايرد الوقـت لـي فاتـك

لا تترك الدمع فـوق الخـد يتحـدر
حاسب ترى كل عمري فوق وجناتك

يانور عيني مادامك عيني بك تنظـر
حرام تبخل علـى خلـك بنظراتـك

ماشفت كيف القمر عقب الظلام انور
بالضبط نفس الشعور ان شفت بسماتك

ان كان في خاطرك حاجه علي ابشر
والله لاسوق العمر كلـه لمرضاتـك

ماتدري انك اذا تكدرت انـا اتكـدر
وافرح لجل فرحتك واشره لشرهاتـك

عودتني ع السهر وامسيـت ماتسهـر
ماغير طيفـك يعوضنـي بسهراتـك

احلى سنيـن العمـر بلقـاك تتعطـر
يادنيتي وابـرك الساعـات ساعاتـك

يمر طيفك واضمك وارجـع استغفـر
وارد اشوفـك واقـول الله محلاتـك




أحـــلـــى زعــــــل

جيت بزعل عليك وناوي بالخصـام

كل ما في خفوقـي بس ازعل عليـك

يعني روّح واروّح واسري ليل الظلام

بس من يوم شفتك قلت برضا عليـك

خل روحي بروحك هذا اغلـى وسـام

خل عيني بعينـك خل ايـدي بديـك

ياشـروق المحبـه يا شمـوع الغـرام

يا ورود بحــــياتي عطرهـــا يهتديـك

سلم برمش عينـك هالتغلـي حــرام

ما تموت المشاعر دامنـي احتويـك

انطبع في خفوقي اسمك بحرف لام

وفي عيوني عشقتك وبحياتي ابيـك

دامك بوسط عيني كيف عينـي تنـام

ودامك بنبض قلبي كيف مـا افتديـك

مد لي كف وصلك قولهـا بحـتـرام

موت احبك واحبك موت انا اموت فيك

عاد تبغي الصراحه ما نويت الخصـام

هذا قلبي يحاسـب كل خطـوة اليـك

اقترب لك حبيبي بالغلى والسـلام

يا حبيبي بصراحه حلوه غمضه عنيك


=P
Originally posted at 5:06AM, 5 October 2008 PDT ( permalink )
BuByeeeee =P edited this topic 8 months ago.

BuByeeeee =P [deleted] says:






روح وروح

روح و روح ابعد بدنيـاك // يا متعب قلبي بصـدك …
الدرب لي ضحـك بكـاك // موت تكوى بنار حقدك …

كم في العذارا ناس شرواك // بحر الجمال يفوق مدك …
اليوم الـي بيصيـر ويـاك // باكر معاك الايام ضدك …

تذكر زمان كنـت اهـواك // انت الوحيد ومين قـدك…
ودك ادور غيـر لقـيـاك // ودك ادور غيـر ودك …

انا نسيتـك قبـل لانسـاك // وحتى خفوقي اليوم هدك …
وبكل صراحـة واتحـداك // اوقف مكانك عند حدك …

لقياك اصبح مثـل فرقـاك // والبحر مده غيـر مـدك…
والدرب لي ضحـك بكـاك // موت وتكوى بنار حقدك …


زايد



يمين الله يميـن الله عقـب مـا ضجّـت الوديـان
بامدّ غْصون عذري قبل تثمِر بالذنـوب غْصـون

أنا باستغفـر الله وارجـع اتعـوّذ مـن الشيطـان
قبل لا ابدا الكلام وقبـل ترجـح بالكـلام وْزون

قبل أعزا العَرَبْ واعزف سنين اللي خبرها كـان
أقول اش حال نخوَتْنا وحال اللي رضوا بالهـون

عـلام قْلوبنـا شَتَّـى وبيـن أفعالـنـا شَـتّـان
تخالَف فكرنا حتى ضحَـك مـن حالنـا شـارون

تسنّمنا الخلاف بْـداجْ ليـل وصبحنـا مـا بـان
عن ايّة صبح نتكلّـم مـا دام أن الطريـق ظْنـون

سراب الظنّ يغري بس يـا بعـده عـن الظميـان!
ومن يتبع سراب اللال ظنّه وش عسـاه يْكـون؟

ومن يتبع سـراب الـلال ظنّـه يـورِدْ الغـدران
مِثِلْ من يطلب مْن الموج في عِز العواصف عـون

غريبه كيف حاضرنا غدا مـن حاضـره حيـران
وإذا منّا ذِكَرْنَا لي مضى صـار الكـلام شْجـون

ذِكَرْنَـا عِـزّ ماضينـا وضـاق بْدمّنـا الشريـان
وضاق البحْر بِدْمانا وضـاق بْنـا وسيـع الكـون

جرى دَمّ العَرَبْ من مغرب (المغرب) الين (عْمَان)
من (المغرب) الين (عْمَان) ضاقت بالعتاب حْضون

غدا صنع الدهـر فينـا صنيـع السيـل بالعيـدان
بلَغ حَدّ الزبى وارّث بنا من كل صـوب طْعـون

تقلّب يا دهر مـا بيـن زيـف القـول والكتمـان
كما الأفعى تقلّب بألف معنى وألْـف لـون ولـون

عِراق المجد ما تطوي مشارقهـا سمـا النسيـان
ولا والله ننساهـا ولـو بعْـض العَـرَبْ ينسـون

نحبّ أرض (العراق) ولاجل أهَلْهَا يرجح الميزان
ويهتف باسمها ركْب الشعوب اللي غدوا يسعـون

سعوا من شرْقها للغرب يرثـون العَـرَبْ ركبـان
غريبه كيف حتى الغرب لاحوال العَـرَبْ يرثـون

شعارات الوفا طاحـت بيارقهـا علـى الشطـآن
على شط (الفرات) و(دِجله) انهارت كبار حْصون

على نارين نـار الحـرب والفتنـه لهـا نيـران
جرت بين القلوب ونوّخت في حاضـرة هـارون

تشتّت شمْل من كانوا علـى درْب الرخـا خِـلاّن
يجـدّم بعضهـم قولـه وردّ البعـض منهـم دُون

ولا يقـدَر يلـمّ الشمْـل غيـر القايـد الـربّـان
حكيم الراي له نرضى وبه كل العَـرَبْ يرضـون

قدَر يجمع شمِل هذا الوطن من سالـف الأزمـان
ولازالـت بـلاده بالمكـارم قدْرهـا مَصْـيـون

بعزمـه وحّـد بْـلاده ورَدّ بْحزمـه الطمـعـان
وثبّـت منهجـه بالحـقّ والدستـور والقـانـون

تسامَـت بـه قوافينـا ومالَـت بالقصيـد ألحـان
بذكر اسمه تسامَت وافصحَت عـن درّه المكنـون

سمـوّ الوالـد القايـد نَعَـمْ زايـد ابـن سلطـان
نَعَمْ زايد نَعَـمْ زايـد بذكـر اسمـه تقـرّ عْيـون

نَعَمْ زايد نَعَـمْ زايـد اهـو اللـي شيّـد البنيـان
وعلاّ للسما صـرحٍ تضمّـه راسخـات رْكـون

مواثيقه على العدْل اشهـدت باسـم الله الرحمـن
وراياته علـى متْـن السحـاب وجانبـه مامـون

على مَدّ النظـر مـدّة يمينـه مـا يـردّ إنسـان
ولا ضيفـه يـردّ إلاَّ وعنقـه بالثـنـا مَـدْيـون

وَلا قلت الجديـد إن قلـت جـوده وَرَّدْ العربـان
صفات الجود له تشهد وبـه كـل المـلا يـدرون

مزونه ما تميّـز مـن كَرَمْهـا ظامـي ورويـان
وإذا هلّت تسوق بْطيبهـا مـا لا تسـوق مْـزون

وإذا للفخْر داعي نحن نفخـر بـه رفيـع الشـان
وإذا للدار داعـي كـل منّـا حاضـر وممنـون

يميـن الله يميـن الله متـى مـا ضمّنـا الميـدان
لَتلقى فعلنـا مـع قولنـا باسـم الوطـن مَقْـرون





برج العَرَبْ

في عبَارات العيون أشْيَا كَثيره تسألك
دَمْعَها حَكي وْندَاها بَلَّل الخَد النديّ

ما قدرت أرضي غرورك واستحيت آزَعّلِكْ
كلما لك وانت تنْهِيْني وانا ارِدّ ابْتِديّ

دام نَظراتك مَدارات وْرجَا قَلبي فَلَك
كَم عـن (برج العَرَبْ) يبعد مدى (برج الجدي)

قلت تقريباً عدد ما عاشِقْ بْحبَك هَلَك
تقصد الا عدّ نِصّ جْروح قلْبي يَا بْعَديّ

قلت لك لا لا ترد تْقول لي مَا قلت لك
المشاعر ما تنام الاّ انت قلت لْهَا ارقديّ

وانت يوم الله عَطَاك أحلى الوصوف وْكَمَّلك
كيف تتركني على شَطِّك وانا قلبي صديّ

والله ان عروق قلبي كلّها ترتاح لك
ليتك الاّ مثل ما خذت بْيدك خذت بْيديّ

من لمَسْت ايدك وانا اتْفَداك واتْفَدَّى هَلِكْ
ما دريت أنَّ الهَوى والعشْق باللَّمْس يْعَدي؟




بـرج عاجي

في حضورك في غيابك ما يغير لي مزاجـــي
في كلامك فـــي ملامك ما تكدر لي طربها

لا تحسب ان كل قلب انعكاسه كلزجاجـــي
وان ياخذ كل عين و يلعلن نهبـــها

كيف اعذرك عقب هجرك و ان برجك برج عاجــي
شفت نفسك مثل شمس للنهار الله وهبهــا

من عطى لك حق تجرح من يقول انك علاجـــي
لا تسولف عـــن علاجي و الجروح انته سببها

لا تناجي في عتابك العتب غير التناجـــي
خذ مقامك بحترامك لا تبين لي عتبـــهـا

طال داجي كيف اناجي في الهوى شخص احتجاجي
صار قدره مثل عذره يشبه ذنوب ارتكبهـــا

لا تلاعب بل مشاعر دام بحر الشوق هاجـــي
المشاعر نبض شاعر والحضيض الي كتبهـــا

و انت الي صرت خلي احذر اقوال المداجـــي
قال كلمه لوم لاكن ماعرف كيف يحسبهـــا

وان صفينا و التقينا لا تكدر لي مـــزاجـــي
خذ مقامك بحترامك لا تبين لي عتبها





غصون الراك

يا (أحمد)خفوقي غدا في يدينها لعبة
لعب الهوا في غصون الراك لا مالت

و هي في قلبي تمركز في طرف شعبه
وذكرى غلاها ليا ذا الحين ما زالت

قولوا لمحبوبتي نفس العنا تعبه
وان قلتوا إلها .. أبا اعرف إيش هي قالت

إلى متى هالخفوق يعيش في رعبه
وشلون يركد شعوري و الغلا فالت

الحب حاكم طغى ظلمه على شعبه
و النفس تشكي على ظلمه ولا احتالت

يا بنت أنا صعب ودموعي بعد صعبه
من قو عزمي ليا ذالحين ما سالت

إن كنتي الزين من راسه إلى كعبه
نفسي لحب المكارم و العلا نالت

الله يحرم عذولي شوفة الكعبه
ياللي يدينه إذا طال القفا طالت

لو كل من شافت عيوني تولع به
ما صرت كني في غصون الراك لا مالت




يا أيهـــا

تعال يا وجه السعد واشطب على الوجه البغيض
يا حــيٌك وطلتــك في وجهي بعد يا حيٌـها

تنعشني انعاش الشفاء العاجل لقلب المريض
يا أيــها . . تـدري يا لبٌـــيك وش يا أيٌـها؟

ما انته بزيٌ الناس واكتبها لك بخط عريض
تبغيني احلف ؟ لا ورب البيت ما انت بزيٌها

ياللي غرامك في خفوقي من كثر قدره يفيض
النفــس تندب حظها والعين تبــكي حيٌــها

من عَوَضْـكَ لْيا فقدتك وان وجد كيف استعيض
وانت النهار وشمسه وشجرة غلاي وفيٌها

هاجرت واصبح زوالك فـ عيني يهاجرني وميض
يا أول جــروحي دخيل الله من تاليٌـــها

أحيا حلى وصلك واموت بكل برد وكل قيض
تظما مشاعر خافقي لك وانت سبٌة ريٌــها

لبيك ياللي من عشقتك قمت احس اني حظيظ
يا مغويٍ نفسي ونفسي ذايبه من غيٌــها

أنا اعرف ان كل الليالي سود وألايام بيض
دامـك معي ماهمني في كثرها وشويٌـــها




قرار فزاع

ما عاد لك في قلب خلك مكانـه
لو كنت أمامه يجهل أنك عيونـه

منته الذي تتملكـه فـي زمانـه
صعبه حبيبي عن رماتك حصونه

يامن تعود ع القـدر والخيانـه
الحب غالي لو انكم ترخصونـه

ارخصت قدرك يوم خنت الامانه
وين الوفا لي عندكـم تتدعونـه

لقيت بك امن الغراشيـب دانـه
حصباه منك والآلـي مخزونـه

جمال حسنك ما يسـاوي بنانـه
فتون زينك ما يحرك غصونـه

عـود يشابـه لادن الخيزرانـه
عازل هضيمه بين حيب ومتونه

أبغي وصوفه لكن الوصف خانه
حرت بجماله وتوهتنـي عيونـه

لأني صويب مرهف من سنانـه
عـزاه قلـب نازفـات طعونـه

يقولها لـي قالهـا مـن كيانـه
يحسب حسابه قبل لا يحاسبونـه





فمان الله

فمان الله يادربِ على الهجر يتحراني,,
خذاه الوقت من جنبي ولا جاني ولا جيته ,,,,,

قصيدي يا قصيدي اسكن فقلبي طرف ثاني ,,
قبل يسكن بيوتي جنه وتمسي عفاريته,,

تعال اسأل نجوم الليل ياهاجر من ألهاني ،،
وأنا أعلمك بالوقت الطويل وكيف قضيته,,,

بغيت أقوى على بعدك وراح الصبر ما أمداني ,,
أهز الشوق وإن طاح الوله بالحضن ظميته,,,

ربيعي يا خريفي يا شتاي ويا صيفي الهاني,,
تراك أنت الفصول وهجرة الشاعر وتشتيته,,

فضت كل الشوارع مالقيت اللي ترياني,,
مثل طفل طلع يلعب ورد ومالقى بيته ,,,,

تحداني،،،تحداني،،،حبيبي لا تحداني,,
أنا لولاك لحن الهجر والفرقا ما غنيته,,,

تمنيتك وقلت فخاطري ليته تمناني ,,
وأنا ما كل واحد شافته عيني تمنيته..

على كيفك تذكرني ،،،على كيفك تناساني,,
وأنا طاريك ولايوم في قلبي تناسيته ،،

زرعتك وردة حمرا تزين كل بستاني,,
ودفنت القلب في تربة مشاعرنا وخليته,,,,

أنا المجني عليه اللي يقدر طعنة الجاني,,,
لأن جرحه يذكرني بطاريه لا حسيته ،،،




الصمت نعمه

الصمت نعمة والتواضع فضيلة
والكون له خالق وفي الأرض حكام

والمجد غاية والجمايل وسيلة
والموهبة للروح تعبير والهام

واللي يدور حاجة مستحيلة
لابد ما يجزع من النوم لا نام

لو كنت أدور للبيوت الجميلة
شبّعت عطاش الورق حبر الأقلام

ماني بمن يكتب لقاله وقيله
أو طامح بتصفيق ودروع ووسام

وأنا لو اكتب لي قصيدة طويلة
أصوّر التعبير تصوير الأفلام

أشعل سما الابداع نار وفتيله
وازرع مساحات المعاني بالالغام

واشفي عذابات الكبود العليلة
واغيّر انشاءات..واكسر ارقام

أجيب روس الكاملات الجزيلة
صناعتي ماهي صناعة الأعلام

والا الضعيف ابو المعاني الهزيلة
ما هوموصّلها ولو يركض أعوام

أما الثقيل أبو المعاني الثقيلة
يبغي له أربع خمسة سنين قدّام

أنا كذا،،مالي مع الشعر حيله
كلما كبرت اشوف حسّادي اقزام

يا هاجسي باوصيك ولك الدليله
رح بلّغ اللي عايشين بالاوهام

قل للبخيل اللي يمينه بخيله
ترى حياته كلها...عدّة أيام

أعطي العطا لو هي بحاجة قليلة
على الأقل يقال من نسل الأكرام

ويا دمع خلّك في العيون العليلة
بجاه من صلّى لربه ومن صام

لا تنتثر على الخدود النحيلة
وتهتز لك حكام...وعيال حكام

حتى عيال العود راع الجزيلة
حتى بني السؤدد ومن لام ينلام

تطول قوايمنا مع كل عيله
وتحني قوايمنا على دموع الايتام

وقل للمعاق اللي ما تمشي رجيله
الناس بالاحساس ماهي بالأجسام

وترى أحاسيس الخفوق النبيلة
توصّل اللي ما توصّله الأقدام




حربيه

مرحبا ما هبّ م الريف ذنّاني .. مع عبيرْ المسك والطيب مقرونه

مرحبا يا من له القلب شفقاني .. يا زعيمٍٍ كل شعبه يحبونه

يا زمام المجدْ يا عالي الشاني .. يا عجيدٍ يعجز الوصف من دونه

يا ركن زايد على كل لاركاني .. ما حدٍ زايد على زايد ابكونه

يشهد التاريخ له ابكل برهاني .. نايفٍ ع المستنيفات بغصونه

لمّ وحدتنا على صدق وايماني .. وراية التوحيد بالعزّ مرهونه

بالوفا وافي وبالحق ميزاني .. وكلمته في موقف المجد مضمونه

في سدادْ الراي ما يبدّله ثاني .. قدوة ٍهو في الجدا يستمدّونه

جرّ وحدتنا إلى عالمٍٍ ثاني .. بالتقدم والرخا حسب قانونه

صان حاضرها عن اعيون عدواني .. والخفايا بأصدق الودّ مكنونه

نفتخر باسمه على طول لزماني .. عاش يا من له لامارات مرهونه

له سلامي والتحيه بصفطاني .. عد نوح الورق لي جرّ بلحونه



يا طيب القلب

يا طيب القلب حكم قلبك الطيب
أخرت غيرك وبعدته وقربتك

ليه التباعد مع انك دايم قريب
من وين مااصد في عيوني تخيلتك

ليه انت ناسي وذكري عندك مغيب
تنسى وانا اذكرك وانسى اني تذكرتك

صارحتك بما يكن القلب ياحبيب
والظاهر اخطيت فظني وصارحتك

لو يعزى الصبر دونك قال ماثيب
المشكله ياطول العمر مشكلت

الصبر شيب وشوق القلب ماشيب
لازال يلعب في قلبي كل ماشفتك

كم حسن الظن فيك وترجع تخيب
كدرت بالي وانا مايوم كدرت

اليوم حتى شعوري منك متريب
هذا خفوقي يحذرني وحذرتك






فهمت وما فهمت

فهمـت العشـق لـى يطلـب مـن الإنسـان ذَرْف دْمــوع
فهمت العشـق لـى يطلـب مـن الإحسـاس كـل أوجـاع

فهمت العشق لى يفرض على الإنسان يعيش بجوع
فهمـت ومـا فهمـت اللـي سـكـن فــي داخـلـه فــزّاع

فهمـت العشـق بحـر أحـلام غزيـر غزيـر بليّـا قــوع
فهمـتـه بـحـر أحـلامـي بـحــر عـشـقـي بـلـيّـا قـــاع

فهمته نبض فهمته لمس فهمته روح ولا مسمـوع
فهـمـت ان العـشـق فـرصـة عـمـر متـخـبّـيٍ بِـقْـنـاع

قريته درس فهمته عِلْم أعيشه روح بنور شْموع
بكيـتـه دَمّ جرحـتـه لا عـرفـت انّ الـصـراع صْـــراع

فهـمـتـه.. لـــه قـوانـيـنٍ ولـكـنّــه بــــلا مـمـنــوع
فـهـمـتـه أصــعــب دْروبٍ مشـيـنـاهـا بــــلا مــرجــاع

فهمـت ان العشـق غصـن الوعـد فـي خافقـي مـزروع
فهـمـتـه مـلـجـأ الإحـســاس ولـكـنّـه بَـعَــدْ ضـيّــاع

فهمـت ان العشـق أحيـان يشبـه فِ النـزول طْلـوع
عيشه في اختلاف الوقت مثـل مـا تختلـف الاصبـاع

فهـمـتـه جـامــع ويـجـمـع وجـمّـعـنـا بــــلا مـجـمــوع
بــلا مـرسـى بــلا ميـنـا بــلا شـاطــي وبـــلا مـربــاع


فهـمـتـه عـالــم الـوحــده شـعــارٍ رايـــع ومـرفــوع
فهمتـه كوكـبٍ ثانـي.. يبيـع الكـلّ مــا ينـبـاع

فهمـت العشـق لـى يطلـب مـن الإنسـان ذَرْف دْمــوع
فهمت العشـق لـى يطلـب مـن الإحسـاس كـل أوجـاع

فهمت العشق له أنواع وعشقـي مـن فريـد النـوع
فهـمـت ومــا فهـمـت أَصْــلاً وش الـلـى داخـلـه فَـــزَّاعْ





العذر يابوي

مرثية الشاعر حمدان آل مكتوم


العذر يابوي لو ماشلني ساقي
الحزن ما طاقني والقلب ما طاقه

ياعيني ابكي وساعدها يا خفاقي
ما هوب بعيبٍ يفيض الدمع ف احداقه

يا موحد الدار .. يالمتفرد الراقي
والغيم حزنٍ جذب الاحساس براقه

اشوف كن النهار يحدر احداقي
واشراقته ما تشابه أية اشراقه

ومن يعذل القلب عن ضيقته لا ضاقي
انسان مشكوك في مذهبه واخلاقه

ياحاكم الارض و أول وآخر اشواقي
يفداك قلبٍ حزن فرقاك ما ذاقه

في غيابك الناس ماتت وانته الباقي
لأنك الغالي اللي يذبح فراقه

يبكيك من يغرس النخله على الساقي
يبكيك راعي الشداد وراعي الناقه

والطيب والجود والعزه والاخلاقي
والارض وترابها والبحر واعماقه

شيخٍ مقامه سكن ما بين الاعماقي
حتى الزمن من محبينه وعشاقه




ياسلام

ياسلام الله عليها ياسلام = يا سلامي على العيون وخدها

كنه نور يشع من تحت اللثام .. سيدة في الحسن منهو قدها

دونها الساعة تمر الفين عام .. ودامني معها تسرّع عدها

ما يوصف ما بها زود الكلام .. والجمال اللي بها ما سدها

نابية ردفين وخصور هضام .. آه ويلي من حلاته ردها

الجسم ماعاد تشيله عظام .. وكنني ما بين جزر ومدها

جارف الاشواق واسرار الغرام .. وكل ما في خاطري هو بيدها

لك خفوقي ثم عقل مستهام .. بس روحي سيدي لي ردها




ارتجـــــاليه فزاع
تلفــــوني

يا مرحبـــــا يا مغلط في تلفوني
مسموح .. مسموح والغلطات عفويه

صفريين تسعه وسته .. سته تموني
الرقم هذا فتح خط الســـعودية

ان قلت لبيك آمر هذي عيوني
فتحت ذا القلب والنيه على النيه

خليت لك في الحنايا بصمه ولوني
تفرق على لون دمي في مجاريه

خليت لك يا حبيبي بيت فرعوني
يخربط الناس في الروحات والجيه

وخليت لك في عيوني ركب وضعوني
تزعل وتنزل تحت جفني وفوقيه

يا صاحبي وان نشدني طيفك شلوني
اقول طيب وطيفك فيه ماريه

ماريه يوم تقبل تجذب لحوني
واجر له من لحون الشوق قافيه

بيحت يا قاصد الغلطات مكنوني
وانا رومنسي احب اهل الرومنسيه

من دونك اعيش وانت تعيش من دوني
يا لين اوحيت صوتك يا لعنبو حيه

رجت زوايا خفوقي وانشد ركوني
وانا ولد شيخ لي هيبه وشخصيه

الارض ارضي والكون المرجله كوني
لكن الحب والعاشق وطاريه

تكفون يا ناس بالله لا لا تلموني
الصدفه اللي بلاني عاد جبريه

سموني العاشق المغرم وسموني
الشاعر اللي قصايده ارتجاليه

قنابل من فكر راسي ومضموني
لكن قنابل غرامه هي بذريه

واغني البيت متواكب وموزوني
مبدع ومجنون وافكاري خياليه

يا نجد ودي اغني بك على هوني
حورية الارض فوق الارض نجديه




يا ابن آدم

يا ابن آدم كل ماكنت انظر الجرح العظيم
مالقيت اعظم من جروح الندم بين الجروح

ويا ابن آدم كل ماقلت الزعامه للزعيم
ينتشي بي كبريائي فوق شاهقة الصروح

والدروب يقودها درب الصراط المستقيم
واستقامات البشر بين الصراحه والوضوح

والغصون اللي فرحها غير لا هب النسيم
ماتسأل عن معاناة الحمام اللي ينوح

ياهل الزور ان حلفتو زوركم وجه الكريم
فاح ريحاً من الكذب والكذب له ريحاً يفوح

يارحيم الصدر ضايق حيل سترك يارحيم
والدروب طوال واقدامي من اللهفه جموح

اعطني من لدنك التوفيق والعقل الحكيم
والعزيمه والمعزه والمراجل والطموح

والقمر يغريني اغني على اللحن القديم
ويجذب البراق عيني كل ماشفته يلوح

والقساوه للرجوله والنعومه للحريم
ياكثر ناسا تجي في عيني وناسا تروح

اكثر اهل الارض خلاني وانا مالي نديم
يشتكون جروحهم عندي وانا كلي جروح





ما يشل الراس

صـارت الدنيـا غريبـه وصـرت انــا متـولـه
عشتـهـا حـلـم خيـالـي والغـريـب لـحـالـي

عشتهـا بكـل راحـه واصبـحـت لــي ممـلـه
عشتهـا فـي إبتسامـه وعشتهـا غربـالـي

ذاك درب إل .. حبيبـي قلـت ذاك اسهـل لـه
وهذا دربي لو طويل اسهل لي وأسوى لي

لـو طريقـي فـي عنـا أو درب انـا مـا ادلـه
أحسـن آضيـع طريقـي لـو بربـع الخـالـي

آنا ضاري ع الصعايب، الصعب أوصل لـه
الصعـب سهـل علـيـه، الصـعـب يـحـلا لــي

الـصـعـب لـــو هـــو صـعــب والله لا آذلـــه
لا أذل عينـه لاجلهـا ف .. قولـي وأفعالـي

مــا يـشـل الــراس إلا لــي يحـطـه يـشـلـه
وما يوطي راس دايم فـي العـلا أو عالـي

كـان طبعـه مختلـف أو كلمتـه فـي محـلـه
هـو رزيـن ولا حكـى يعنـي تقـوم جبالـي

ميـزتـه حسـنـه طبيـعـي صــار كـلـه كـلـه
هـو علـى بعضـه حلـو مـن حسنـه القتالـي

لـكـن الـلـي اسـتــوى .. الـطـيـن زاده بـلــه
ورحت انا في درب ثاني مالها أو ما لـي

باختصـار آقــول هــذا خــل فــارق خـلـه
خـل يحلـي حياتـه بشخـص ثانـي بـدالـي

وبصـراحـه .. كــل كـلـمـه قلـتـهـا مـتـولـه
أل (دبي) وإل (دبي) وهي (دبي) ف بالي






إهداء لسمو الشيخ
هزاع بن سلطان بن زايد آل نهيان"حفظه الله"

أنــــــا أن قلت الشعر فيك الشعر تزهى مقالاته
وحرف القاف يرقص لك طرب هـــــزاع باشواقه


سليل الجود والمعروف في ذاتك ومن ذاتـــــــه
يا ابن سلطان بن زايــــــد يا بيت العز ووثاقـه


لك الدولة يا شيـــــــخ الشعر ويا فاهم مجالاته
تزف أفراحها رايات بعالي السحب خفاقــــــه


تبارك لك على نصـــــــرٍ عساها تزيد جياتـه
مدام النصر لك عادات تبيع وتشري أسواقــــــه


إذا منه تعلى غبــــــــارهن زادت طموحاتـه
يحب المركز الأول مــــــــلك حبره مع اوراقه


على البحرين حط ارحالها خـــــــــيله وقوات
وصار الفوز غاياته ولا عنه أحد عاقـــــــــه


ورث أصـــــــل الـفروسية من أجداده وعاداته
كــريمٍ طيبٍ محبوب بين الـــــــناس باخلاقه


يا خوي ابارك لك بشـــــــــعرٍ كانه ابياته
توصف شاعــــــــرٍ نفسه على الطولات تواقه





مين يحبك كثر ما حبك انا

مين يحبك كثر ما حبك انا
و مين بحبك حاول و ياما اجتهد

ومن في عينه شوفتك كل المنى
لا و رب العرش ما غيري احد

انت شوفي و انت عمري و الهنا
يا جسد بي روح و لروحي جسد

و انت عيني و انت نوري و السنا
و انت اسبابي اذا حبي خمد

و انت ميعادي و سهدي و العنى
و انت تعذيبي و صبري و الجلد

و انت راحاتي و روحي و الظنى
و انت الاول ما به قبل و بعد

لمنا جو المحبه و ضمنا
و من بعد قربك انا كيف ابتعد

شوف ما كبر يا حبيبي عشقنا
فاق كل العشق وحده و انفرد

لو يوزع البسيطه حبنا
مابقى حدٍ بها يكره احد




لاتندفع

لا تندفع و تقول كلمة احبك
و انته تظن اني انا و انت اغراب

ادرس دراسه بين قلبي و قلبك
و عقب الدراسه ينولد بينا اعجاب

خلي القلوب تعيش قربي و قربك
و خلي الشهد من وجنة العمر ينساب

خلي التلاقي بين دربي و دربك
او باختصار اقول خلينا اقراب

يا شمس شوف القلب كيف انعجبك
شوفه حبيبي كيف بمحبتك ذاب

شوف القصايد كلها تنكتبك
و انت لقلبي غالق كل الابواب

سهم الغرام اليوم دامر ارتفع بك
و انت تايس في القشق دون اسباب

معنى احبك يعني معنى احبك
و حلو الدلع يا سيدي بين الاحباب

كيف اجيك

كيف اجيك و كيف انا ابدى في غرامك
كيف قلي ابتدي لك بالكلام

لك اسلم بس ما جاني سلامك
يعني مستكثر علي كلمة سلام

وش اسوي حتى انا استدعي اهتمامك
و افتح الموضوع يا بدر التمام

ابتسملك او اقاطع في كلامك
او اجيك بكلمة فيها احترام

ما قدرت ابعد مدام اني امامك
ولا قدرت اشرح مفاهيم الغرام

حرت بك و احترت بك خذني مدامك
ما يهمك من غدا بحبك حطام

ابتدي بك حب يا عمري علامك
ما تحس احساس من صابه هيام

كان عن كل الهوى صار اعتصامك
ما طلبتك غير و عليك السلام





مريم

الحلا يحتويها و الغلا يرتجيها
شيخة الحسن مريم الله الله عليها

عيدها عيد ثاني بين القلب و محاني
قلت اسبق التهاني و اتعنى و اجيها

يا البنات الصبايا عندي اها هدايا
ما طارت الرواية و استحيت اهاديها

لان مريم هديه من اله البريا
القلوب النديه لو ظمت ترتويها

نور شمس تعلى فوق بدر تجلا
دونه الوصف ولا غايه في الحسن فيها

من دكر من اسلافي وارف الظل وافي
ابتديها القوافي قبل لا يبتديها

الصبا مال بانه و قلت انا خيزارانه
سمو دبي دانه لا مريم عليها







ويـن أنت

وين أنت ياللي كل ما قلت .. وين أنت
حتى السؤال يقول وين الأجابه

عامين ضايق و أنت لليوم ما بنت
و هي حالتي بين الحزن و الكـابه

ليش أنت بعيون المخاليق ما شنت
في عين من حبك سرابه ..سرابه

لو لا الغلا يا صاحبي ما تمكنت
صداً من الهجران صاير خرابه

عود علي أنا أترياك لاهنت
الحال واحد والظروف أتشابه

إذا سألت تحبني قلت لي كنت
وأنا ابتسم من باب حب الدعابه

وأن خنتني أعلم ترى ما بعد خنت
ألا معك لكن خونت ذرابه

خنتك مع طيفك بعد ما تيقنت
أنك علي بعد الثرى و السحابه

أكبر خطأ محبتك وأنت ما صنت
حباً يخلده المشيب أ لشبابه

تدري آش يغيض الرجل في هوى البنت
أنه يعيش في واقعاً ما درابه

لكننا وش هو أنا وانت ويش أنت
هذا السؤال إللي يبيله إجابه






النــــاس للنـاس

خلك معي خلي ترا الناس للناس
ضدي ترا ضدي ومعايه معايه

احس بك دايم بانفاس الانفاس
وانته ضيا عيني ومنايه منايه

لاتسمع العاذل وسواس وسواس
ومن علتي انتي شفايه شفايه

لو طال هجرانك فـ لاباس لاباس
غلطان استاهل دوايه دوايه

السهم من عينك وامواس الامواس
وانا اناديــــلك دمايه دمايــه

سمعتي الموشي وارجاس الارجاس
واللي جرا منــك كفايه كفايه

اعلنت من وصلك بافلاس الافلاس
واختاري انتي بين شايه وشايه

اما ترديلي باحساس الاحساس
ولا انتفارق والنهايه نهـــايه

متعود ابدله الالماس بالالماس
مايهم اكسب والهوايه هوايه

خدعت حاسب يضرب الراس بالراس
مسكين وادريبه ورايه ورايه




لا تجزع

لا تجزع من أمر الولي ولا تضيق وتعترض
يكفيك فخر إن المشاعر خلتك محبوبها

لا والذي بعث محمد و أرسل الحق وفــرض
دينه على أرض وبسط هدايته لشعوبها

ما غبت عنا يا حزامي ولو يغيبك الــمــرض
غلاك يسكن في عيون أهل الوفا وقلوبها

يا جــعل أمـثـالــك يـزيـد وعكسك يـنـقـرض
لـجـل بلاد جابـتـك تخضر في كل دروبها

ويعرض التاريخ نبذة عن حياتك ما عرض
إلا مـواقـف تـلفت أنظار المواقف صوبها

علم مؤكد ليس بمتوقـع ولـيس بـمـفــتــرض
لأن نـفسـك تـجذب الـعالم بحسن أسلوبها

نشمي ولا حصلت لك محتاج تقضي له غرض
وأعدائك تدور منافستك لكن يا دوبها

يمناك تعطي وما تحسب بالعطا لو تقترض
ميزة النفس العزيزة عزها مطلوبها

دخيل الله لا تطول معه تكفه يالمرض
ما تدري إنه المشاعر خلته محبوبها




تقزمي

تقزمي في عين حسادي وأنا عملاق فرض
لأن علوي عن وطاهم شي ربي ملزمه

ما تشوف حجم الشمس متقزم على أصحاب الأرض
متقزمين ويحسبون الشمس جات مقزمة

يا رب و أنا عبدك إلي ما بعد هتكت عرض
و إذا لقيت الضايق المحتاج وقفت أعزمة

إن ما علي أشبهك وإذا غضبت أقول إرض
رزنامة أفضالك مداهة ما تشابه الأرزمة

زد مشبري في الطول طول ومن قوي العرض عرض
أو اعطني النصر المبين إلي ما غيرك يهزمه

لو المراجل تنشرى سحبت لي مليون قرض
حتى أثبت محزمي يوم تراخى الأحزمة

شفت الحياة بدنيتي سنه وشفت الموت فرض
يوم أتقزم في عيون العالم المتقزمة




بواحة الأسرار

بواحة الأسرار منقود منقود ***لا لا اتكلم باللسان الطليقي

ترنيمة النهوند وترنيمة النود *** قام يعزفها حيل و أنا في ضيقي

يا ذا البشر يا راعي الخيل والذود ***كيف الخيانه لي تجي من رفيقي

ما كنت بأعشقها ولا كنت بأعود*** لين اكتشفت انه هواها حقيقي

في مقلتيك أنهار وبحور وورود*** لايق وفيك الوصف كله يليقي


يا معادي للنكس تستاهل الزود***وأنا لك بسمع الغرام استليقي

ارحمني بنظرة ترى نظرتك جود *** مشاعري نامت ولا قلت فيقي

ظميان قرب شفتك زيد الخود *** أخاف أموت فراق ما ابتل ريقي

صحيح أنا محبوب للبيض والسود*** لكن ما غيرك لقلبي عشيقي

إليا فتحت العين ألقاك موجود ***ذكراك ترسم صورتك في طريقي

ولا تشعل النارين يا مخصر العود *** أنا بليا عود زايد حريقي





آخر طموحاتي

يا أخر طموحاتي وذروة حنيني *** تلبس على فاللك وأنا فالي أموت

أموت في اللبس الخفي المبيني***والشعر لامنه تناثر على الكوت

والصوره الي بين خدك وبيني***تقول للسكر تعال المس التوت

وعيونك اللي تحتها شامتيني *** خيل العرب في معركة عين جالوت

كل شي يتمنى يشاركك فيني***الأرض والأشجار والبحر والحوت

يا مبرأك يا مظلمك يا ظنيني***ما ضاعلك ضايع ولا فاتلك فوت

أقسى الرجال ان شاف حسنك يليني*** والبنت في جنبك تتحول لطاغوت

خذني معك بلاك أنا مايبيني*** يا شعر بوراشد ويا سحر هاروت

هذي أمنياتي يا مبعثر سنيني ***الود ودي نجتمع لو في تابوت

ودي أحطك ياحبيبي في عيني ***وأسكر عيوني عليك أنت وأموت

وأدخل معك قبر الغرام الحزيني*** واسمع تناهيت المحبه بلا صوت






قوس الربابة

استمد الشوق حيله وانتحابي *** لين صادفني طريقٍ كنت اهابه

لي شهر وانا ماغير اكتم مصابي *** واتجمل فالوجيه من الذرابه

لين حدتني مخاييل السحابي*** والسنين اشباح والايام غابه

شفت مامنها مصده واجتنابي*** لكن الله رحمته تسبق عذابه

ياوجودي من عناي وياذهابي*** وجد من خلوه ربعه للذيابه

في نهار هيب اللي مايهابي *** يعتنق عج المنايا بالسحابه

منك ياللي فاقدٍ منك صوابي*** قمت اعشقكك مثل عشقي للكتابه

شف غيابك وين وداني وجابي*** بس مع الايام زودني صلابه

حس فيني يامعودني غيابي *** في وجودي وش مدى فرق التشابه

ليه ادق الباب دام الباب بابي *** يامعيشني تفاصيل الغرابه

يامعودني على صبر احتسابي *** يا معرضني شقى القيض وسرابه

الدروب طوال لكنك زهابي *** شوف حالي كنها قوس الربابه

اعتقدت انك تعاني من عذابي*** يكسرك صوت الاحبه والغرابه

واثرك اللي مستريح ولا درابي *** ماتعرف الا تمادي في غيابك





صباح الخير

صباح الخير يا أهل الخير صباح الورد والعنقود ***صباحا ً كل ما هز الشعر غصنه قضى ثارة


إلى جادة يمينك يا البني ادم جود ها مردود ***من اللي أمره نجوم السما تنساب مدرا ره


ورجلا ً ما يوقف في حياته موقفا ً مشهود*** يعيش يموت ما يدري عن أحواله ولا أخباره


وليا مر الفتى بأول صباه ولا قدح بارود ***أجل وش خانت أيام الشباب وينعت أزهاره


يجودون الرجال وجودنا ينجاد منه جود ***وحنا اللي نبطل للعطايا بكل محاره


على درب المعزة ما قصرنا حبلنا الممدود ***ولا حتى نفكر لو يجور الوقت قصاره


يعلمنا الزمان ونستفيد ونبذل المجهود *** وعزيزين النفوس أنفسهم صلفه ومغوارة


بلشنا ما عرفنا من هو المذموم والمنقود ***وأشوف الجار ما يسد ديون اللي على جاره


وضعيفين النفوس من الليالي حيلهم مهدود ***وأنا حيلي صواديف الزمان تزيد إصراره


وأنا عندي على كل الكلام اللي أقول شهود ***حشى ما ني بثرثر والقلوب السود ثرثارة


أشوف النفس مثل البكرة اللي ما تحب القود *** وعسفها واحدا ً نفسه على الأيام صباره


ولا يا سحب هلي لين أشوف الما شرات العود*** تباشر بها رعايا الإبل بعد الغيض وغباره


ولا يا شمس طلي لين تجلين ألليال السود *** وأشوف النور في عيونً من التفكير محتاره


و الا يا قلب خلك مثل ما أحيدك حفيظ سدود***ترى الرجال لو يكشف سدوده يطيح مقداره


و الا يا عين تبكين ما دام البكا منقود ***تحلي بالصبر والعزم تارة ورى تارة


ولا يا طير غرد دام حبل وصالها ممدود***هنوف ً لتذكرها خفوقي زادت أثاره


كن في ثقرها ريحه اليسمين والكمبود ***تثنى كنها غصنا ً عليه السحب مطاره


تلفت كنها ريميتا ترعى بوسط حدود ***مكان في فؤادي زمان ومحدا ً زاره


يا آية من بنات الخود من بعدك بنات الخود *** هنادي ريم حصة مي عفرا غالية سارة


سراب الظامي اللي مستحيل إنه يبل كبود ***محطمهم غلاك اللي تحب الرجل مشواره


تعالي لا تخليني على باب الأمل مفقود *** فراقك سبب جروح الحزين وكثر أضراره


وأنا اللي حاضرا ً ذكري لوني ما هو بموجود ***أحب الشامخات ولا أطرق ألبيبان في الغارة


أنا للمرجلة صقرا ًجناحينه تضم النود ***ما غير محمد بن راشد بن مكتوم صقاره





قم علــم الصبــح

قم علم الصبح ويش البارحه قلنا
خله يقول لعواذلنا تصافينا

حتى يعرفون يوم انا تزاعلنا
كله على شان يقهرهم تراضينا

حنا شربنا الغلا حتى تمايلنا
من نشوة الحب تتبعنا خطاوينا

نكسب تعاطف أهل الحب بتعاملنا
وهروج حسادنا ما أثرت فينا

ياما وياما حكوا لكن تجاهلنا
تلامس احساسنا يسبق خطاوينا

من بدهم في الوفا حنا تأهلنا
كسرة ايدين التجافي من تسامينا

يا بحر كان انت في موجك تساهلنا
في الحب نبحر ونرسي في موانينا

روض المحبين محمي في مداهلنا
وزهور الأشواق تنبت في مراعينا

إلنا الشرف والنقا ونشرف أهلنا
عن الرذيله على النايف تعلينا

يا ضامي الحب أروتنا مناهلنا
اذا طوانا هجير الحب تسقينا

والسالفه كلها يوم تزاعلنا
كله على شان نقهرهم تراضينا
__________________
ما بال بعض الناس صاروا أبحرًا
يخفون تحت الحب حقد الحاقدين
يتقابلون بأذرع مفتوحة
والكره فيهم قد أطل من العيون
يا ليت بين يدي مرآة ترى
ما في قلوب الناس من أمر دفين

يا رب إن ضاقت الناس عما فيا من خير

فـ عفوك لا يضيق

(((( راشد ))))
رد مع اقتباس
  #2  
قديم 13 - 6 - 2009, 01:38 AM
الصورة الرمزية ملاك المشاعر@
ملاك المشاعر@ ملاك المشاعر@ غير متواجد حالياً
عضو ذهبى
 
تاريخ التسجيل: 11 - 1 - 2009
الدولة: الإمارات
المشاركات: 8,454
معدل تقييم المستوى: 123
ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute ملاك المشاعر@ has a reputation beyond repute
رد: ديــــوان فزاع الاول

تسلم على شعر فزاع ويعطيك العافيه
رد مع اقتباس
  #3  
قديم 13 - 6 - 2009, 02:12 AM
الصورة الرمزية ابن الإمارات
ابن الإمارات ابن الإمارات غير متواجد حالياً
عضو ذهبى
 
تاريخ التسجيل: 23 - 7 - 2008
المشاركات: 3,488
معدل تقييم المستوى: 53
ابن الإمارات is a jewel in the rough ابن الإمارات is a jewel in the rough ابن الإمارات is a jewel in the rough ابن الإمارات is a jewel in the rough
رد: ديــــوان فزاع الاول

روعه الصراحه يسلموا
__________________
منتديات الرمس الحوارية

رد مع اقتباس
  #4  
قديم 13 - 6 - 2009, 02:16 AM
الصورة الرمزية patchena
patchena patchena غير متواجد حالياً
عضو ذهبى
 
تاريخ التسجيل: 12 - 8 - 2008
الدولة: The heart of the cities
العمر: 31
المشاركات: 4,349
معدل تقييم المستوى: 53
patchena will become famous soon enough patchena will become famous soon enough
رد: ديــــوان فزاع الاول

ياسلام عليه فزااع شعره في قمة الروعه الصراحه
__________________
منتديات الرمس نت
رد مع اقتباس
  #5  
قديم 13 - 6 - 2009, 10:59 AM
الصورة الرمزية RAKBOY783
RAKBOY783 RAKBOY783 غير متواجد حالياً
مدير التغطيات والفعاليات
 
تاريخ التسجيل: 3 - 12 - 2008
المشاركات: 44,601
معدل تقييم المستوى: 20
RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute RAKBOY783 has a reputation beyond repute
رد: ديــــوان فزاع الاول

شـكــ وبارك الله فيك ـــرا لك ... لك مني أجمل تحية .
رد مع اقتباس
  #6  
قديم 18 - 6 - 2009, 04:59 PM
UM HZA3 UM HZA3 غير متواجد حالياً
إداري سابق
 
تاريخ التسجيل: 21 - 12 - 2007
المشاركات: 855
معدل تقييم المستوى: 47
UM HZA3 is on a distinguished road
رد: ديــــوان فزاع الاول

.
.

السلام عليكم ورحمة الله وبركاته

الوطن موال اخضر

يعطيك الصحه والعافيه
على الديوان الكامل

يستاهل التثبيت

الله يحفظ فزاع وكل شيوخنا

دمت بخير وحفظك الرحمن
.
.

ملاحظه . . عند نقل اي موضوع من موقع اخر يرجى ذكر ذلك

رد مع اقتباس
  #7  
قديم 18 - 6 - 2009, 05:03 PM
الصورة الرمزية ياليت للحب قاضي
ياليت للحب قاضي ياليت للحب قاضي غير متواجد حالياً
عضو ذهبى
 
تاريخ التسجيل: 27 - 5 - 2008
الدولة: RaK....!!!
العمر: 29
المشاركات: 4,473
معدل تقييم المستوى: 52
ياليت للحب قاضي will become famous soon enough
رد: ديــــوان فزاع الاول

تسلمـ اخويهـ ع الديوان },~

وربي يحفظ شيوخنا},~

وربي يعطييك العافيـهـ},~


ولا تحرمنا من يديدك دوومـ..},~
__________________
رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
سيارة ][فزاع][... الريمـ مجلس السيارات والدراجات 28 28 - 11 - 2009 03:58 AM
صور هوايات فزاع .. قلم رصاص مجلس الصور العامة 9 19 - 2 - 2009 10:38 PM
( بو خالد يحضن فزاع ) ،،،، قلم رصاص مجلس نبض الوطن 15 29 - 3 - 2008 12:01 AM


الساعة الآن 05:30 PM


Powered by vBulletin® Version 3.8.11
Copyright ©2000 - 2020, vBulletin Solutions, Inc.
Ads Organizer 3.0.3 by Analytics - Distance Education
المواضيع و المشاركات المطروحة بمجالس الرمس الحوارية لا تمثل رأي الموقع او ادارته بل تمثل وجهة نظر كاتبها