السلام عليكم ورحمة الله
من فترة وانا صارلي اسمع عن سالفة المسلسلات التركية وكنت اظحك على موجة الادمان الي غزت امخوخ الاوادم
وما صدقت انه الواحد بمجرد ما يشوف حلقة وحدة يقوم يتعلق بالمسلسل لي نهايتهأبداً ما كنت متوقعة هالشي
ومن بعد هالادمان سمعنا عن حالات طلاق وانتحار وقتل من ورى هالموجة السخيفة وبعد ماصدقت
لين عايشت الواقع بنفسي وبوسط بيتيأعلنت في نفسي حالة من اليأس والذهول من الي قاعد يصير حوالي
عندي اخت فالتقنية ,فتاة متدينة لأبعد الحدود وملتزمة
دخلت عليها قبل فترة الحجرة :فلانة بتسيرين ويانا بيت يدتي؟؟
ردت:لأ ياسة اشوف لحظة وداع
انا:شووو؟؟ليكون مسلسل تركي بعد ها؟؟
اختي:هيه
انا:ماشاء الله حتى انتي ادمنتي هالخرابيط
اختي:لأ المسلسل عادي ومافيه مصاخة من جذا اتابعه
انا: هالمسلسلات مافيها غير حب وما حب
اختي:لأ القصة كذا كذا كذا وما هدتني لين قالت القصة بحذافيرها
انا:يصير خير ,,احين بتين ولا؟
اختي:لأ جربت الحلقة الاخيرة ومابا افوت شي
وهذا موال اختي لييييين خلص المسلسل وافتكينا منه
احينه يينا على موال ثاني اخس واخس وهالسالفة يديدة ومع مسلسل تركي يديد
العوق انه لا اخوي ولا اختي الي امتابعين
الي امتاابع الراس العووود فالبيت
ابوووي ذبحنا على مسلسل عليا
اكثر من مرة صارت هالسالفة لين لاعت جبدي من حركات الوالد والوالدة
انكون ياسين فالصالة وابووي قابظ الريموت ويفرفر فهالقنوات ويقول:وين عليا؟؟حطولي القناة الفلانية
اقوم انا اشل الريموت عنه واحطله القناة الي يباها واثناء ما ياسه ادور تدخل الوالدة عرض
الوالدة: ... حطيلنا الجزيرة
وانا امبينهم:احينه شو تبون منه ولا منه؟؟
الوالد:لأ حطيلي عليا
الوالدة:وانا اقولج حطي الجزيرة وما عليج من ابووج,,خلونا انشوف اخبار هالناس والعالم
الوالد:يعني انتي شو بتشوفين؟؟غير قتل ومجازر وحروب
انا فداخلي:صادق ابووي
الوالدة:الي ما يحس بهموم امته مب مسلم والله باجر بيحاسبنا يوم ما انحس بإخوانا المسلمين
الوالد:حسي ابروحج ,,الريم حطي عليا
الوالدة(بدت تتنرفز):حطي الجزيرة اقولج,,,,جان تسحب الريموت من ايدي
الوالد(زعل وشل بقشارة ساير حجرته)وما يرمس الوالدة بالايام
وهذا موالنا الشبه يومي
والله مادري اظحك عالسخافة الي صايرة ولا اصيح على الادمان الي صاير للأثنين
وانا اقوول للأثنين لأن حتى امي عندها ادمان للقنوات الاخبارية من الجزيرة لي الاقصى لي الرأي لي الرافدين لي الحوار وااااااااااي انا روحي يوم ادش البيت اتعقد
والحالة الي فيها ابوي بعد لا تطاق
حتى اخواني الشباب يطيحون فيه طيحة على هالمسلسل يبون يعقدون فيه عسب يودره بس لاحياة لمن تنادي
ساعات نطلب من الوالد امور وما يروم يسويها بسبب هالمسلسل
والله وصلت فيه درجة الادمان انه يرقد عقب صلاة العشا ويرد ينش عالساعه12عسب بس يشوف الحلقة اليديدة قبل ويرد المغرب ويشوف الاعادة
شو الحل يا ترى ؟؟؟
بنقول مسلسل عليا وبيخلص وياخوفي يرد يطلع مسلسل غيره ويدمن عليه
والله اتعقدت من هالامور
احس ساعات محتاجة اني اسولف ويا امي بس ما تفظى بسبب هالاخبار التعيسة
وساعات ابا اطلع وتنشغل بالبرامج الحوارية واتعيش الجو ويااااهم
من جذا اسير حجرتي وانعزل عنهم
ودي نتناقش فموضوع هالادمان..
هل مرت حالة عليكم ابنفس هالادمان؟؟
هل حاولتوا اتعالجونها؟؟واذا هيه كيف كان الحل؟؟؟
شو فإعتقادكم مخاطر هالادمان؟؟
رد مع اقتباس