[align=center]الأسباب اللي ذكروها الإخوة والخوات صحيحة ويزاهم الله خير ، ولكنها قديمة قدم التاريخ، يعني لو كانت هاي هي الأسباب بس ما بتزيد الظاهرة هالزيادة الخيالية ...

لكن ليش زادت هالظاهرة واستفحلت؟؟؟

حسب رأيي لأن:

جيلنا للأسف ما تربي عشان يشيل مسؤولية أو يبني أسرة والأجيال الياية للأسف الشديد أدمر... يعني الولد ايي عند أمه يقلها أباج تدوريلي وحده طرطريششششن شعرها سايح"ن" و أسود"ن" كالليــــل ،وطولها مدري كم متر وضروسها نفس اللي في دعاية كرست، وعيونها مثل عيون البقر ، وخشمها مثل حد السيف ، وبراطمها نفس براطم النوووووق... لا ودلووووعه ومدري شوووو... تسير الأم أقرب عرس وتتنقى!! البنت تبا لكووووشة والحفلة والفستان ، يعني العرس كحفلة أهم عندها من الريل خخخخ ، المهم وبعد الحفلة تبا تعيش مسلسل تركي، الزوج يكون العاشق الولهان اللي كله وياها ويسأل عنها ويدلعها ويسفرها ويتشرالها...والريال ما يبا وحدة تطلب منه وتلزمه بمسؤوليات يبا وحده تكون حلوة ودلوعه وبس ما يفكر بالالتزامات اللي بيحطه فيها العرس، والنتيجة مصايب ومشاكل، لا هي تعرف تدير بيت طول عمرها في بيت أهلها ما تسوي شي وما عندها استعداد تتعلم، ولا هو كان مسئول عن هله لا يوديهم ولا اييبهم ولا يتشرى مونه البيت وما عنده استعداد يسوي هالأمور لأنه كله ويا ربعه هذا ان ما كان يخربط خارج نطاق الزواج بعد مثلما صرنا نسمع وااايد، وبالتالي هالزواج محكوم عليه بالفشل...
لا هي سألت عنه وعن دينه ولا عن أخلاقه و عن شخصيته لأنها تبا تعرس وما صدقت على الله أو لمجرد انه حليو أو مقتدر ماديا، ولا هو سأل عن دينها ولا عن شخصيتها ولا شي لأنه يبا وحدة بموصفات شكلية معينة وخلااااص....

وجذي يفشل الزواج...

مرة كنت في عرس والمفاعيص قوم 16 و 15 يقولون: "خخخخ تصدقون هالعرس كله عشان العالم يعرف أن هالشخصين بتكون بينهم علاقه جسدية" ... فقلتلهم عيب وها مب السبب،جان يقولون لي: "عيل ليش الناس يعرسون، يعرسون عشان هالسبب" ... تميت مبققة عيوني!!! الحين هذا هو مفهوم ها الجيل للزواج! بالنسبة للي يقرون تعليقي الحين سواؤ كانوا معرسين أو مب معرسين اسمعوني عدل:

الزواج شركة بين اثنين، مبنية على الاحترام المتبادل قبل الحب، ومثل أي شركة هالشركة محتاجة ناس يداومون فيها ويقومون مسؤولياتهم فيها على أكمل عشان تنجح ... وأقلكم بكل ثقة بتمر عليكم أيام سودا ما يتحسون بالانجذاب لبعضكم، وهاي الحلوة اللي خذتها بتجوفها بكل أنواع الكشش والبهدلة مب بس وهي كاشخة ويمكن تقصر فيوم من الأيام ، وهاللي تتحسبينه فارس احلامج بتيي ايام يسود عليج فيها عيشتج ، لكن بالصبر والاحترام المتبادل ومراعاااااااااااة الله في كل أمورحياتكم وقيام كل واحد بواجباته بتكون هالأوقات سحابة صيف عاااابرة ، وبتستمر الحياة... الصبر والاحترام والاخلاص ومراعاة الله كفيلة تخلي أي زواج يستمر...
[/align]