بسم الله الرحمن الرحيم الحمدلله رب العالمين حمدا كثيرا طيبا مباركا فيه كما ينبغي لجلال وجهه وعظيم سلطانه والصلاة والسلام على خير الخلق اجمعين سيدنا محمد صلى الله عليه وسلم
اما بعد اسمعوا قصتي هذي وهي حقيقية بس الاسماء والمكان غير
زرنا ويا المدرسه احد المرافق بالدولة واخذ التلاميذ يتجولون يمين ويسار وانا وياهم بين الشياب وكبار السن واحنا نسمع للشرح من المسؤلين لفت انتباهي شيبه يالس على الكرسي البعيد وبعيونه سرحان وجنه محد حواليه قربت منه وسلمت
رد على وقال وعليكم السلام ورحمة الله
شحوالك الوالد
بخير الله يسلمك
انا اسمى بو سلطان شو اسمك بالخير
انا بو حمد
شحوالك الوالد بخير انشاء الله
الحمد لله بوي اكل واشرب والحمد لله
حسيت انه عيونه بتدمع خليته وروحت بس ما غاب عن بالي ولا عن خاطري يوم عن يوم حبيت اعرف قصته تميت اسال واتحرى عنه ما خليت حد ويوم عرفت قصته ندمت
بوحمد هذا من خيرت الرجال واحسنهم بحار سيد البحر ونوخذا محد مثله عنده اربع اولاد وبنتين عاش حياته كلها لعياله رباهم وعلمهم وزوجهم احسن الزيجات حتى انه عرس ولده العود يضرب فيه المثل ويوم كبر بوحمد وثقلت ريوله وقل بصره تم العيال يحولونه بين بيوتهم من بيت لين بيت حمد العود البكر كبر وكبرت مهامه وصار من الكباريه مثل ما يقولون واصبح ابوه عار عليه والاصغر من حمد سافر امريكا وعاش فيها بفلوس ابوه ونسى ابوه اما الاصغر متزوج من عائله مرموقه وزوجته ما تحب ابوه في البيت وياها لانه يتدخل في حياتها وبيتها والاخير غرته فلوس مشاريعه اللي كونها من فلوس ابوه والاخير ما يعرف ولا يبا يسمع اخبار ابوه اما البنتين الصغيره ما هاين عليها ابوها وتزوره كل ما سنحت لها الفرصة اما الكبيره مثلها مثل اخوانها
سرت لين حمد وشفته في قصره الكبير وتلاقيت وياه والناس من حوله مثل الفراش على الضوء قلت له ممكن كلمه طال عمرك قال لي قول قلت له ابوكم طال عمرك مشتاق لكم قال لي شو منو ابوي انا ابوي متوفي صخت بي الدنيا وطلعت من عنده وانا كاره عزه وفلوسه والله كنت ساير برمسه يساعدني في ديوني ويوم سمعته كرهته وكرهت دنياه خليته وسرت للصغير وقلت له مثل ما قلت للعود قال لي ابوي شحواله الحين قلت له من متى ما شفت ابوك قال مدري يمكن سنتين
حسبي الله ونعم الوكيل حبيت اساعد هالريال بكل وسيله تميت اسال واتحرى عن بناته كيف اوصل لهن كيف وبعدين اتفقت مع المشرفه بعد ما عرفت العنوان انه نسير للبنت العوده ويوم سرنا ودخلنا وسلمنا ردت علينا كم تبون صدقات للمركز مالكم ؟ قلنا لها احنا يايين من طرف ابوك قالت ابوي فقير شحواله الحين بخير قلنا لها ابوك يبا يشوفكم قالت هذا كبر وخرف وين اسيرله الحين انتوا ما تشوفون الاعمال والاشغال اللي انا فيها
رديت وانا جني ساحب جبل وراي معقوله احنا مسلمين معقوله هذول عيال حرام والله حرام اللي يسونه في ابوهم ليش وعلشان شو هذا كله علشان المراكز ترا المراكز تفنى وتم السمعه الفلوس تخلص ويتم العمل كرهة الفلوس والمراكز اللي تسوي بالناس جي
رجعت المركز وشفت بو حمد ياهي خواطر بكتني وعصرت قلبي
معقوله هالذيب استوى جي لا انيس ولا ونيس
معقوله هالاسد اللي صال وجال وكون الاموال يستوي فيه جي
هذا جزاه لانه افنى عمره في رضى عياله
ويوم وصلت للحقيقه امنت بربي
تدرون انه بوحمد سوا في ابوه جي من قبل
تركت المكان وتميت امشي لين وصلت بعيد رفعت راسي في قصاصة صغيرة احفظها في محفظتي
(( البر لايبلى والاثم لا ينسى والديان لا يموت افعل ما شئت كما تدين تدان))
رد مع اقتباس
