الدنيا يوم اقبلت

[ولد المطر]

بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته
هذا رجل من اهل زمان كان يعيش في راس الخيمه وهو فقير معدم واصلا هو من البحرين وجاء لراس الخيمه لطلب الرزق والمعيشه وما حصل عاش وتزوج من اهل راس الخيمه
والرجل من اهل الله طيب مقيم الصلاة حبوب واللي يميزه اكثر لحيته الطويلة اللي تتدلى على صدره وينادونه بو دعيج بس مشكلته انه فقير معدم ما يملك شيء من الدنيا وفي يوم حب يرجع لاهله في البحرين ويزورهم ما حصل حد يوصله لانه التوصيل له ثمن وهو ما عنده فراح لنوخذا اسمه بوسالم قال له : توصلني البحرين في طريجك ردالنوخذا اوصلك بس بشغلك على المحمل تنظف وتخم وتقوم بخدمة الغيصه قال موافق
وهم في عرض البحر في الطريج للبحرين مروا على هير والهير مكان في البحر يعرفه النواخذه لانه فيه محار اللؤلؤ وقف النوخذا سفينته وطلب من البحريه الاستعداد للغوص
وبودعيج طبعا يمسح وينظف ظهر السفينه من اوساخ المحار ونبات البحر (( الشبا ))
وعند العصر طلب بودعيج من النوخذا انه يغوص النوخذا عارض بس تحت الحاح بو دعيج وافق غاص بودعيج وفي القاع وهو يبحث عن المحار مر شعر لحيته في وسط محارة كبيره طبقت على لحيته وما قدر طبعا يتحرك واظطر الى حف المحاره من تحت وما هان عليه يقص لحيته حمل المحاره كامله لين السفينه والكل طبعا متعجب من هالمنظر العجيب ومن كبر المحاره
وفي الصبح فتح المحاره ولقى فيها اربع دانات ما شافت العين مثلهن من كبرهن وجمالهن
شلهن بودعيج وعطا النوخذا قال له النوخذا حشا والله ما خذتهن هذا رزقك وانا يوم اتفقت وياك اتفقت على الخدمه بس
بودعيج نزل للبحرين وباع الدانات كلها وبمرور الايام والسنين صار من كبار التجار وصاحب اسطول بحري سفن غوص وسفن تجاره
وفي يوم حب يرجع لراس الخيمه يشوف شو صار على اهله واللي تركهم ربط كل سفنة بسلاسل حديد وخلا بين كل سفينه واخرى مسافة اربعين ذراع
وهو في طريجه لين راس الخيمة هبت عليهم الثريا والثريا نجم يسبب الرياح والامطار والامواج العاتية في البحر كسرت كل سفنه وقطعت كل سلاسله وما تم حد من بحريته والله اعلم بمن نجا منهم المهم ان بو دعيج تم مسمر على وجه الماء لين التقطه سفينة سفر كويتيه شلته وهو في حال يرثى لها عالجوه لين ردت عافيته واتفق النوخذا وياه يوصله لين راس الخيمه بخدمته ورجع يمسح السفينة وهو يغنى ودموعه تسيل

(( الدنيا يوم اقبلت بشعره تنقادي 000 والدنيا يوم ادبرت قوي الحديد ما فادي ))

وسلامتكم
على فكرة القصة حقيقية بس الاسماء غير

[ابن الإمارات]

يسلموا على الطرح

[patchena]

يسلمو على الطرح

[فتى الرمس]

تسلم اخوي بس اعتقد المثل فيه غلط والصح
الدنيا يوم اقبلت يت بشعرات تنقادي ويوم ادبرت سلاسل قطعت مافادي
والسموحه

[7oor UAE]

ثاااااااااانكس

[loogin]

حلووووووووه القصه و الله

احب اسمع هالنوع من القصص


خاصه لما يدوتي تقولها لي

و لالازم شعر يتكلم عن القصه في النهايه ههههه



يزااااااك الله كل خير يا أخوي

[ولد المطر]

تسلم اخوي بس اعتقد المثل فيه غلط والصح
الدنيا يوم اقبلت يت بشعرات تنقادي ويوم ادبرت سلاسل قطعت مافادي
والسموحه

كلامك صحيح بس هذا اثر يعني مب ثابت في ديوان معين او حد ادعى قوله
يعنى له عدة روايات وحسب من سمع ومن روى عن السامع وجزاك الله خير على التوضيح