عشيقها يحضر زواجها ويلقي قصيده

[دلوعة أهلها]

أبد .. ما جيت أبارك ولكن جيـت باوصّيـك
على الله ناوي ٍ تدخل بهـا الليلـه .. مُعذّبْتـي

ترى لولا الظروف اللي عطتْك وحدّت محاكيك
قسم بالله ما تدخـل عليهـا لـو علـى رْقبْتـي

ولكنّ النصيب اقوى ولا ادري ويش اسوّي فيك
نعم .. صارت معزّبتك .. ولا صارت معزّبْتي

كذا شاءت بنا الأقدار تحرمني لأجـل تعطيـك
كذا لازم عشان تفوز إنت .. أخسـر بتجربْتـي

تراها غاليه جـداً .. وتكفـى .. والله يخليـك
تـدللها .. تدلعهـا .. تنسّيـهـا مصاحبْـتـي

أنا من كثر ما اغليها أحس اني بديـت اغليـك
ولا تسـأل بأيّـة حـق ولا ّ وش مناسبْـتـي

لإنك لو بتسألني بتسمع شـيء مـا يرضيـك
لـذا ياخـوي لا تسـأل ولا تسمـع لأجوبْتـي

أبيك تحطها في داخل عيونـك وبيـن ايديـك
وهي دلوعه اعتـادت علـى كثـرة مداعبْتـي

فداعبها شوي شوي حتـى تشتهـي طاريـك
وشاغبها إليـن تقـول لـك: بطّـل مشاغبْتـي

واذا هي مالها خلقك..ولا تضحك ولا تسلّيـك
تحمّلها وإسألهـا: يـا عمـري ليـه عصّبْتـي
وبالك اسمع انّك يوم تضربها وهـي تشكيـك
ما يحتاج اورّي لـك بفـن الضـرب موهبْتـي

صحيح انك بتملكها ومعك العقد بالتمليـك
وانا عارف حـدود الله ومـن حقـك معاقبْتـي
ولكن قلّها المجنـون وصّانـي وهـو يعنيـك
يقـول انّـه بينتظـرك ولـو شيّـب وشيّبْتـي

وانا مجنونها اللي ما نساها وانت مـا يمديـك
تغطّي ذكرياتي في هواهـا.. وربْـع تجربْتـي

أحس اني تماديت بكلامي.. والغضب حاديـك
ولو انّك في مكاني مـا تفكّـر في محاسبْتي
كفاك اني تركت الليله اشغالي عشـان اجيـك
دخلت القاعه برجلي ولا ادري ويش عاقبْتـي

انا ما جيت اخرّب عرسك الليلـه ولا آذّيـك
أنا جيتك عشان اخاطبـك واسمـع مخاطبْتـي

توصّى..وانتبه..واحرص عليهـا والله يهنّيـك
ترى كل الكلام اللي طلَع مـن ضيقـيَ وكبْتـي

ولكن ما قدرت انّي أقوله وانـت مـا يخفيـك
أخـاف انّـي إذا قلتـه تقـوم وتقطـع رقبتي

[بحر الثواني]

كلمات روعه انا سمعت بهذا الشعر
تسلمين اختي ع الكلمات..

[فارس الرمس]

بصراحه روعه
تسلمين

[مزايين الرمس]

الله يعين العاشق على البعد

سبحان الله كل ما اقرى هالكلمات اتفكر ياترى في مثل هالحب بهالزمان ؟؟؟؟؟

تسلمين اختي على النقل ويعطيج العافية

[ابن الوطن]

شعر حلو الصراحة ..‘


مشكور ع النقل ..‘

[المناعي]

قصيدة وافيه ويقصر القول عن مدحها

يعطيج العافيه على النقل

[علوي مال راك]

تٍسُلـًٍـم أًخوُوٍيً

أهٍنُيً الحُـبٍ

مًـآٍلتً عُ الٍحبٌ أحيـُـٍنً

[حور راك]

شو قصدك علوي مال راك

حب الحين مب شي خلاص أنت تزوج وبنحضر عرسك

ولا يهمك

[عيون محمد]

صراحه اللي يحب من خاطره بيسوي اكثر عن جيه

الله يعينه المسكين


وتسلمين على الطرح

[نجاة الظاهري]

أحب هالقصيدة وايد . .

و للعلم . .

هالقصيدة للشاعر محمد الشهري ~

ما شاء الله عليه جريء و مبدع ~

ما أتخيل واحد يسوي هالحركة في ليلة عرس حبيبته . .

بصراحة . . أشوف هالشي قلة حب . .

لأنه بيؤذيها بهالطريقة الجريئة صراحة . . و اللي يحب ما يؤذي حبيبه شو ما كان . . و شو ما صار ~

..

بس القصيدة رووووووووعة . . أحب أسمعها وايد . . ~