في كل بيت اماراتي

[ماروكو]

السلام عليكم ورحمة الله وبركااته

في كل بيت اماراتي

للكاتب : عبدالعزيز حارب



في كل بيت ياهل إذا زعل انخش في مكان محد يدري به وكل اللي في البيت يدورونه حتى البشاكير ويوم يحصلونه من الفرحة يضربونه


في كل بيت إماراتي شخص واحد على الأقل لو استوى زلزال أو قامت القيامة مستحيل ينش م الرقاد


في كل بيت إماراتي طفل واحد على الأقل بينه وبين المدرسة كره أزلي (ما الله كتب توفيق بينهم)


في كل بيت إماراتي يشترون حليب بوقوس (رينبو) بالكرتون وليس بالحبة


في كل بيت إماراتي دُرج خاص في منيوهات الكافيتريات والمطاعم


في كل بيت إماراتي شخص مسؤول عن إطفاء الليتات والتأكد من غلق الأبواب

في كل بيت إماراتي يوم يصحّون اليهال م الرقاد يطلبون 5 دقايق إضافية للنوم

في كل بيت شخص مدمن على مشاهدة المسلسلات الخليجية (مشكلة لو كانت الزوجة)


في كل بيت إماراتي يتم وضع معلبات الأطعمة في كبتات تحت المغاسل


في كل بيت إماراتي شخص يستحيل أن يشرب جاهي أو حليب في غير ال mug الخاص فيه


في كل بيت إماراتي شخص يخاف يرقد بروحه ودوم يرقد في الصالة ويسحبونه إلى سريره (مشكلة لو كان متين)


في كل بيت إماراتي ضرايب على الآيباد ولازم تسمع عشرين مرة في اليوم (أحينه دوري)


في كل بيت إماراتي يوم يرن تلفون الصالة يشلّه أصغر واحد لأنه ما عنده موبايل (العوض ولا القطيعة)


في كل بيت إماراتي لازم تسمع يوميا من اليهال هذي السمفونية (ملّانين نبا نطلع)


في كل بيت إماراتي أكثر من 3 غراش عسل وأكثر من 3 غراش زيت زيتون وأكثر من 3 غراش سمن عربي وغرشة وحده على الأقل مهياوه


في كل بيت إماراتي ساعة جدار متوقفة لأسابيع ومحد مستعد يبدل لها بطارية


في كل بيت إماراتي ثلاث كرات قدم مفسدات ما فيهن هوا ومعقوقات في حديقة البيت


في كل بيت إماراتي أسوأ مكان في الترتيب الدرج اللي تحت التلفزيون (وايرات وألعاب جيم وسياييد صلاة ودوا وكل شي)


في كل بيت إماراتي ولد يحرص على الصلاة في المسجد ليس بقصد أداء الفريضة بل حبا في دكان المسيد


في كل بيت إماراتي طفل يصر على الشراء من محطة البترول وليس من دكان الفريج (أونّه راقي)


في كل بيت إماراتي إذا مروا يصبون بترول لازم يشترون شي من المحطة

في كل بيت إماراتي الكل يسرق جارجر الآيفون والآيباد (والله معاناه.. افتكيت اشتريت سامسونج نوت باركوا لي)


في كل بيت إماراتي شخص مب راضي عن التلفون اللي عنده ويبا تلفون يديد (تقول بيزات قارون عند أبوهم)


في كل بيت إماراتي مكان سري لحفظ المجوهرات والأشياء الثمينة (نحنا ما عندنا هسسسس علشان الحرامية بس)


في كل بيت إماراتي حلواه هابشين منها من شهرين ومصرين يحتفظون بالطبقة (انزين عقوها)


في كل بيت إماراتي أكثر من كيس مدسوس عن اليهال فيه كاكاو وحلويات منتهية الصلاحية


في كل بيت إماراتي تستخدم أكياس الجمعية التعاونية كأكياس لسلات الزبالة (عاشت الجمعية عاشت)


في كل بيت إماراتي شنط السفر ضايعه مفاتيحها (المشكلة مفاتيح صغار تحملوا الصغارية ياكلون المفاتيح)


في كل بيت إماراتي لازم في شي لونه وردي في حجرة البنات (والا مب حجرة بنات)


في كل بيت إماراتي الجدوال الدراسية ومواعيد الامتحانات معلقة على الكبتات أو جدران الصالة (حتى انتوا؟!)


في كل بيت إماراتي دلة الجاهي والقهوة يوم يغسلونها لازم يجلبونها على ويها (عادات وتقاليد)


في كل بيت إماراتي كبت خاص بالنعول نصّه نعول جديمة، ودّي أعرف ليش محتفظين بها للذكرى مثلا؟


في كل بيت إماراتي الريال أغراضه في كبت واحد والحرمة أغراضها في كل كبتات البيت



في كل بيت اماراتي ريموت كونترول غطاة بطاريته ضايعه ومغطين البطاريات بلزق


في كُل بيت إماراتي ، في طفل معقدينه ان "لاقينه بالشارع" ومتبنينه مب ولدهم صدق و شخص يكره انه يتصور!و واحد تلوع. جبده من أكل. الشغاله و طفل خبير تكنولوجيا..


منقوووووول

[اماراتي وافتخر 40]

ههههههههههههههههههههههاي وايد سوالف موجوده....

صدق اغراضي ما تكفي بالحجره..ووزعت الباقي....

لدلال لازم تنجب ع يهها....وادس اكياس فيها نفافيخ بعد عن اليهال

وسالفه لازم المحطه هاي لازم بس اقنعهم بالدكان ارخص خخخخخخخ
ودوري الايباد هاااااااااااااااااااااااااااااي مسببه لي صداع..اول ما يرفعون راسهم من المخده دوري انا اوووووووووووووول
شكرا ماروكو حبيبتي ع الموضوع الممتع

[وفوي المطاف]

في كل بيت إماراتي يشترون حليب بوقوس (رينبو) بالكرتون وليس بالحبة

هي والله صدقتي خخخ

كل يوم الصبح يسوونه

و المشكله محد يشربه

بس العيون كلها ع غرشة المربى بالتوت و النوتلا

ربي لا هانج خيتو ع الطرح الحلو !

[cool ^-^ dody]

ههههههههههههههههه يسلموووووو

[ع الدرمكي]

هههههههه ..
واقع نعيشه خخخخ ..
تسلمين ع الطرح الحلو ..
ربي يعطيج الصحة و العافية ..
دمتِ في حفظ الرحمن و رعايته ..
=)

[نبض انسان]

في كُل بيت إماراتي ، في طفل معقدينه ان "لاقينه بالشارع" ومتبنينه مب ولدهم صدق و شخص يكره انه يتصور!و واحد تلوع. جبده من أكل. الشغاله و طفل خبير تكنولوجيا..

انا كنت اقولها لأختى