شنو الأكلة المشهورة بكل إمارة ؟؟

[عاشقة القمم]

السلام عليكم

اليوم يبتلكم موضوع بيوعكم شويه بس ماعلي استحملوا

أكلة هل الفجيرة :


يا حافظ على هل الفجيرة ... من تيهم أتقييّل عندهم ضيف ... الله على الكرم الطافح فوق اليبال ...وخصوصا بعد يوم يقربوبك عندهم وتاكل هذيج الأكلة ما ودك بعد تظهر من الفجيرة .. بس الود ودك أتّم تظرب بالخمس ألين اليوم الثاني .. وأكلتهم مشهورة وهيه :

طاسة حلوى حارة وعدالها دلة أقهوه الملقمه في حزتها



أكلة هل راس الخيمة :


ياسلام أتسلم على هالأكلة المشهورة اللي عندهم .. .. أموت على طبيخكم اللي ما ينطبخ اللا على ظو يريد وحطب وما بينهن طابوقتين .. الصراحة يعت مشتهي طاسة جامي ويقط ولبن من امارة راس الخيمة ......... السموحة بويه منكم ..

و أكلتهم هي الجامي و اليقط و اللبن



أكلة هل أم القيوين :


لاااااااااا .. كله عاد ولا هل أم القيوين ..

الصراحة عندهم أكلة ما تخطر على بال واحد بيموت من اليوع .. أسمييييه عندهم أكله ..

ما يطبخونها اللا حزّة الغدا من عقب صلاة الجمعه ..

وهيه أكلة البياح:

تراهم مشهورين أبها ومحد شراتهم وشراياهم .. أنتوا ما تشوفون عربهم ومواطنينهم شقايل ينبع الكرم منهـــــــــم ..



أكلة هل عيمان :


ما يحتاي بعد أزيد عليكم الزود . . معروفين هل عيمان بخبز الرقاق هنتين أبييّزة .. وخصوصا بعد أوف حلاته اذا كان مدهون بدهن خنين .. وووووووه ..

وحظك من السما لو حالفك الحظ حد منهم عزم عليك تقرب عنده في البيت تاكل من ريوقهم أو غداهم أو عشاهم ...

.. ياجماعة الخير عليكم بخبز الرقاق المدهون بدهن خنين
من هل عيمان



أكلة هل الشارجة :


لا لا لا .. كلكم غلطانين .. هب الدانقو ولا شي ولا حتى الباجلة . . هذه كلها خرافات واحد مخرف يوعان .....

عندي انا المعلومة عن أشهر أكله عند هل الشارجة ........... الصراحة غلبتوني .. هيه نعم صدقتوا ..

ماشي أحلى من الدانقو حزّة العصر وحاط جدامك

هالطاسة الممزورة دانقو ولوميتين من الحامض

.. تعصرهن في الملة أمممممممم ....... أوففففففف أشوووووو هالعذاب ياجماعة الخير ..

أبتسم أنته تاكل الدانقو في الشارجة




أكلة هل دبــي :


أكلة هل دبي المشهورة هيه : الهريس .. واللي ماياكل منها يخيس . . وهل دبي معروفين في الأعراس لازم يكون في وسط الحوي

جدر هريس ..

واللي يقرب لازم يغرف له بالمظراب في طاستة .. وأنا مستحيل آكل هريس من أي أما رة ثانية الا دبي .. أقصد كل أمارة ولها خصوصيتها في أكلاتها الشعبية المشهورة .... .....





اكله هل بوظبي والعين:


كل أكله روحها صوب .. وكل وحده منهن ترمس عن عمرها .. ما أدري أشوووووو أطريلكم والاأشوووووووو ..

ترى كل وحده أحلى من ربيعتها .. بس أن بغيتوا الصدق : ترى ريوق هل بوظبي وهل العين شي مذهل وخرافي ..

يعلي أفداهم ويطول في عمارهم عربنا القبايل هل بوظبي والعين فديتهم ...... ..... أوه سامحوني نسيت أخبركم بأسم أكلتهم المشهورة على الأقل في نظري أنا ... ...

خبز خمير بثيث مفروكه والمظروبة ...







وداعة الرحمن

[حبر و ورق]

خبز خمير بثيث مفروكه والمظروبة ...

يوعتيني بس يقولون انه مسوين خبز خمير ف بيتنا اليوم ههههههه

تسلمين على الموضوع الحلو

[عاشقة القمم]

لاهـ عيل طرشيلي أنا يوعانه




تسلمين ع المرور

[همس الوداع]

موضوع مميز من شخص مميز

[عايشة زماني]

موضووع عجييييييييييب.... أشكرج أختي عالطرح..
نتريا يديدج........

[Her Highness]

فديت اهل الشارجه يعلني فداااااااااهم



ربي يحفظهم



ويحفظ الامارات واهلها



يسلمووووووو ع الموضوع

[عاشقة القمم]

موضوع مميز من شخص مميز

محد المميز غير اللي يتواجدون بمواضيعي
تسلم أخوي ع المرور

[عاشقة القمم]

موضووع عجييييييييييب.... أشكرج أختي عالطرح..
نتريا يديدج........

انت العجيبة يا الغالية
تسلمين ع المرور

[عاشقة القمم]

فديت اهل الشارجه يعلني فداااااااااهم



ربي يحفظهم



ويحفظ الامارات واهلها



يسلمووووووو ع الموضوع

الله يخليج لأهل الشارجه
تسلمين ع المرور

[درة مكنونة]

فديتني بنت راك

تسلمين يالغالية

ع الموضوع